ഡിസിസി നേതൃത്വത്തിനെതിരെ 
പ്രതിഷേധം വ്യാപകം

പാലക്കാട്‌

അതീവ ഗുരുതര ലൈംഗികാതിക്രമ പരാതിയിൽ അറസ്‌റ്റ്‌ ഭയന്ന്‌ ഒളിവിൽക്കഴിയുന്ന രാഹുൽ മാങ്കൂട്ടത്തിൽ എംഎൽഎയെ ന്യായീകരിച്ച ഡിസിസി നേതൃത്വത്തിനെതിരെ പ്രതിഷേധം വ്യാപകം. രാഹുലിനെ ന്യായീകരിക്കുന്നതിനേക്കാൾ ഗുരുതരമാണ്‌ അതിജീവിതയെ ആക്ഷേപിച്ച ഡിസിസി പ്രസിഡന്റിന്റെയും വി കെ ശ്രീകണ്‌ഠൻ എംപിയുടെയും പ്രതികരണം. ഇരകളാക്കപ്പെടുന്ന സ്‌ത്രീകളുടെ ഒപ്പമല്ല കോൺഗ്രസ്‌ നേതൃത്വമെന്ന്‌ സിപിഐ എം ജില്ലാ സെക്രട്ടറി ഇ എൻ സുരേഷ്‌ബാബുവും ഏറ്റവും വലിയ കുറ്റകൃത്യമെന്ന്‌ മന്ത്രി എം ബി രാജേഷും കഴിഞ്ഞദിവസം പറഞ്ഞിരുന്നു. എന്നിട്ടും കോൺഗ്രസ്‌ നേതാക്കൾക്ക്‌ ഇനിയും കാര്യങ്ങൾ ബോധ്യമായില്ലെന്നാണ്‌ ഒരുവിഭാഗത്തിന്റെ ആക്ഷേപം. കോൺഗ്രസിലെ വനിതാ നേതാക്കൾ വലിയ അമർഷത്തിലാണ്‌. ‘‘നിങ്ങൾ രാഹുലിനെ ന്യായീകരിച്ചോളു, എന്തിനാണ്‌ ഒരു പാവം സ്‌ത്രീയെ ഇങ്ങനെ പരസ്യമായി അപമാനിക്കുന്നത്‌. സ്വന്തം ദേഹത്ത്‌ തട്ടുന്പോഴേ ഇ‍ൗ നേതാക്കൾ പഠിക്കുകയുള്ളൂ. ഇപ്പോൾതന്നെ മുൻ എംപിയുടെ മകളുടെ പരാതി ഒരു നേതാവിന്റെ കൈയിൽ കിട്ടിയിട്ടുണ്ട്‌. അത്‌ എല്ലാവർക്കും അറിയാവുന്നതാണ്‌, ഇങ്ങനെപോയാൽ നമ്മൾ ആരെങ്കിലും പീഡിപ്പിക്കപ്പെട്ടാൽ കുറ്റം നമ്മുടെ മാത്രം തലയിലായിരിക്കും’’– മുതിർന്ന വനിതാ നേതാവ്‌ പറഞ്ഞു. തെരഞ്ഞെടുപ്പ്‌ പ്രവർത്തനത്തിന്‌ വീടുകയറുന്പോൾ ജനങ്ങളുടെ ചോദ്യത്തിന്‌ മറുപടി പറയാൻ കഴിയുന്നില്ലെന്നാണ്‌ മറ്റൊരു നേതാവിന്റെ പ്രതികരണം. കേരളത്തിലെ കോൺഗ്രസിനെയാകെ നാണംകെടുത്തും വിധമാണ്‌ രാഹുലുമായി ബന്ധപ്പെട്ട്‌ വരുന്ന വാർത്തകളെന്നും ഒരു നേതാവ്‌ പറഞ്ഞു. തെരഞ്ഞെടുപ്പ്‌ പ്രവർത്തനത്തിന്‌ ഇറങ്ങി ജനങ്ങളുടെ കണ്ണിൽ നല്ലപിള്ള ചമയാൻ ഒരു എംപിയാണ്‌ രാഹുലിനെ ഉപദേശിച്ചത്‌. അതുപ്രകാരം ഡിസിസിയാണ്‌ പാലക്കാട്‌ മണ്ഡലത്തിൽ പ്രചാരണച്ചുമതല നൽകിയത്‌. പാർടി അറിയാതെയാണ്‌ രാഹുൽ തെരഞ്ഞെടുപ്പ്‌ പ്രചാരണം നടത്തുന്നതെന്ന കോൺഗ്രസ്‌ നിലപാട്‌ ജനങ്ങളെ തെറ്റിദ്ധരിപ്പിക്കാനാണ്‌.