ഹാഷിഷ് കടത്ത്‌: പ്രതിക്ക്‌ 6 മാസം 
കഠിനതടവും ഒരു ലക്ഷം പിഴയും

പാലക്കാട്‌

ഖര രൂപത്തിലുള്ള ഹാഷിഷ് കടത്തിയ കേസിൽ യുവാവിന്‌ ആറുമാസം കഠിനതടവും ഒരു ലക്ഷം രൂപ പിഴയും ശിക്ഷ. മലപ്പുറം പൂക്കോട്ടൂർ തൊരപ്പ വീട്ടിൽ മുഹമ്മദ് ബാസിലിനെയാണ്‌ (35) പാലക്കാട്‌ സെക്കൻഡ് അഡീഷണൽ സെഷൻസ് കോടതി ജഡ്ജി ഡി സുധീർ ഡേവിഡ് ശിക്ഷിച്ചത്‌. പിഴ അടച്ചില്ലെങ്കിൽ മൂന്നുമാസം അധിക തടവ് അനുഭവിക്കണം. 2018 ജനുവരി അഞ്ചിനാണ്‌ കേസിനാസ്പദമായ സംഭവം. പാലക്കാട്‌ കെഎസ്‌ആർടിസി ബസ് സ്റ്റാൻഡിനുമുന്നിൽ എക്‌സൈസ് ഇൻസ്‌പെക്ടർ എം സുരേഷിന്റെ നേതൃത്വത്തിൽ നടത്തിയ പരിശോധനയിൽ 110 ഗ്രാം ഖര രൂപത്തിലുള്ള ഹാഷിഷ് കണ്ടെടുക്കുകയായിരുന്നു. എക്‌സൈസ് സർക്കിൾ ഇൻസ്‌പെക്ടർ എം രാകേഷ് അന്വേഷണം പൂർത്തിയാക്കി കുറ്റപത്രം സമർപ്പിച്ച കേസിൽ പ്രോസിക്യൂഷനുവേണ്ടി സ്പെഷ്യൽ പബ്ലിക് പ്രോസിക്യൂട്ടർ ശ്രീനാഥ് വേണു ഹാജരായി.