ബിയർ കുപ്പികൊണ്ട് ആക്രമണം; മൂന്നുപേർ കൂടി പിടിയിൽ ​

വാളയാർ

മദ്യപിക്കുന്നതിനിടെ ബിയർ കുപ്പിക്കൊണ്ട് സുഹൃത്തിന്റെ തലയ്ക്കടിച്ച് പരിക്കേൽപ്പിച്ച കേസിൽ മൂന്നുപേർ കൂടി അറസ്റ്റിൽ. കഞ്ചിക്കോട് സ്വദേശികളായ സുബീഷ് (34), ജയരാജ് (24), നിഖിൽ (25) എന്നിവരെയാണ് വാളയാർ പൊലീസ് അറസ്റ്റ്‌ ചെയ്‌തത്. കേസിൽ നേരത്തെ ഗുണ്ടാ നേതാവ് കഞ്ചിക്കോട് കെടിസി മൈത്രി നഗറിൽ ഷാഹിനെ അറസ്‌റ്റ് ചെയ്‌തിരുന്നു. ഇവരുടെ സുഹൃത്ത് മണികണ്‌ഠനെയാണ് ആക്രമിച്ചത്. ഒക്ടോബറിൽ നഗരത്തിലുണ്ടായ അടിപിടി കേസിൽ ജാമ്യത്തിലിറങ്ങി വരുന്ന വഴിക്ക് കഞ്ചിക്കോട് വ്യാപാര സ്ഥാപനത്തിൽ കയറി വനിതാ ജീവനക്കാരിയോട് അപമര്യാദയായി പെരുമാറിയതിനും കടയിൽ അതിക്രമം നടത്തിയതിനും ഷാഹിനെ അറസ്റ്റ്‌ ചെയ്തിരുന്നു. ഒരാഴ്‌ചമുന്പാണ് ഈ കേസിൽ ജാമ്യത്തിലിറങ്ങിയത്. ഇതിന്റെ ആഘോഷത്തിനായി ഒത്തുകൂടിയപ്പോഴുണ്ടായ വാക്കുതർക്കത്തിലാണ്‌ സുഹൃത്തായ മണികണ്ഠനെ ആക്രമിച്ചത്. ഷാഹിനൊപ്പമുണ്ടായിരുന്നവരാണ് അറസ്റ്റിലായവർ. തലയ്ക്ക് ഗുരുതര പരിക്കേറ്റ മണികണ്ഠൻ നിലവിൽ ജില്ലാ ആശുപത്രിയിൽ ചികിത്സയിലാണ്. വാളയാർ ഇൻസ്പെക്ടർ എൻ എസ് രാജീവിന്റെ നേതൃത്വത്തിലുള്ള പൊലീസാണ് പ്രതികളെ അറസ്റ്റ്‌ ചെയ്‌തത്.