21 വർഷം കഠിനതടവും ഒരുലക്ഷം 
പിഴയും ശിക്ഷ

പാലക്കാട്

ആസിഡ് ഒഴിച്ച് ഭാര്യയെ കൊല്ലാൻ ശ്രമിച്ച കേസിൽ പ്രതിക്ക് 21 വർഷം കഠിനതടവും ഒരുലക്ഷം രൂപ പിഴയും ശിക്ഷ. കോയമ്പത്തൂർ രാമനാഥപുരം തേവർവീഥി സഹാബുദീനെയാണ് (43) പാലക്കാട് ഫസ്റ്റ് അഡീഷണൽ സെഷൻസ് ജഡ്‌ജ് ആർ വിനായക റാവു ശിക്ഷിച്ചത്. പിഴ അടച്ചില്ലെങ്കിൽ രണ്ടുവർഷം അധികതടവ്‌ അനുഭവിക്കണം. 2019 സെപ്തംബറിലാണ് കേസിനാസ്‌പദമായ സംഭവം. അതിഥിത്തൊഴിലാളിയായ ഇയാൾ ഒലവക്കോടാണ്‌ കുടുംബസമേതം താമസിച്ചിരുന്നത്. കുടുംബ വഴക്കിനേത്തുടർന്ന് വീട്ടിൽ കിടന്നുറങ്ങുകയായിരുന്ന ഭാര്യയുടെ ദേഹത്ത് പുലർച്ചെ 2.30ന് ആസിഡ് ഒഴിക്കുകയായിരുന്നു. സംഭവത്തിൽ ഭാര്യക്കും കൂടെ കിടന്നുറങ്ങിയിരുന്ന ഇവരുടെ കുട്ടിക്കും ഗുരുതര പൊള്ളലേറ്റിരുന്നു. അന്നത്തെ പാലക്കാട്‌ ടൗൺ നോർത്ത് ഇൻസ്പെക്ട‌ർ ഷിജു എബ്രഹാം, സബ് ഇൻസ്പെക്‌ടർ കെ മുകുന്ദൻ എന്നിവരാണ് കേസ്‌ അന്വേഷണം നടത്തി കുറ്റപത്രം സമർപ്പിച്ചത്. പ്രോസിക്യൂഷനുവേണ്ടി അഡീഷണൽ ഗവ. പ്ലീഡർ പി മുരളീധരൻ ഹാജരായി. എഎസ്ഐ എം സറീന കോടതി നടപടി ഏകോപിപ്പിച്ചു.