കഞ്ചാവ് കേസിൽ 2 പേർക്ക് കഠിനതടവും പിഴയും

പാലക്കാട്‌

കഞ്ചാവ് പിടികൂടിയ കേസിൽ ആലപ്പുഴ ചേർത്തല സ്വദേശികളായ യുവാക്കൾക്ക്‌ കഠിനതടവും രണ്ട്‌ ലക്ഷം രൂപ വീതം പിഴയും ശിക്ഷ. ഒന്നാം പ്രതി കൊല്ലരിത്താഴത്ത്‌ വീട്ടിൽ ലിജോയ്ക്ക്‌ (31) ആറുവർഷം കഠിനതടവും രണ്ടാംപ്രതി ശ്രീവിലാസം വീട്ടിൽ ശ്രീദേവിനെ (29) രണ്ടുവർഷം കഠിനതടവിനുമാണ്‌ ശിക്ഷിച്ചത്‌. പാലക്കാട്‌ സെക്കൻഡ് അഡീഷണൽ സെഷൻസ് കോടതി ജഡ്ജി ഡി സുധീർ ഡേവിഡാണ്‌ ശിക്ഷ വിധിച്ചത്‌. പിഴ അടച്ചില്ലെങ്കിൽ ഇരുവരും ഒരു വർഷം അധികതടവ് അനുഭവിക്കണം. 2018 ജനുവരി 30നാണ് കേസിനാസ്പദമായ സംഭവം. വാളയാർ ടോൾപ്ലാസയ്‌ക്കുസമീപം തൃത്താല എക്‌സൈസ് റേഞ്ച് അസിസ്റ്റന്റ് എക്‌സൈസ് ഇൻസ്‌പെക്ടർ എം എസ് പ്രകാശിന്റെ നേതൃത്വത്തിൽ നടത്തിയ വാഹനപരിശോധനയ്‌ക്കിടെയാണ്‌ തമിഴ്നാട് ട്രാൻസ്‌പോർട്ട്‌ ബസിൽ സഞ്ചരിച്ച പ്രതികളിൽനിന്നും 1.5 കിലോ ഉണക്ക കഞ്ചാവ് കണ്ടെടുത്തത്‌. എക്‌സൈസ് സർക്കിൾ ഇൻസ്‌പെക്ടർ എം സജീവ്കുമാർ അന്വേഷണം പൂർത്തിയാക്കി കുറ്റപത്രം സമർപ്പിച്ച കേസിൽ പ്രോസിക്യൂഷനുവേണ്ടി സ്പെഷ്യൽ പബ്ലിക് പ്രോസിക്യൂട്ടർ ശ്രീനാഥ് വേണു ഹാജരായി.