വികസനം ചർച്ചയാക്കി 
എൽഡിഎഫ്‌

കൊല്ലം

കോർപറേഷനിൽ തെരഞ്ഞെടുപ്പിന്റെ പോരാട്ട ചിത്രം തെളിഞ്ഞപ്പോൾ എൽഡിഎഫ്‌ സ്ഥാനാർഥികൾ പ്രചാരണത്തിൽ ഏറെ മുന്നിൽ. യുഡിഎഫും ബിജെപിയും രംഗത്തുണ്ട്‌. ഡിവിഷൻ, ബൂത്ത്‌ കൺവൻഷനുകൾ പൂർത്തീകരിച്ച എൽഡിഎഫ്‌ കുടുംബസംഗമങ്ങളിൽ കേന്ദ്രീകരിച്ചിരിക്കുകയാണ്‌. സ്ഥാനാർഥികൾ വീടുകളിൽ രണ്ടുറ‍ൗണ്ട്‌ സന്ദർശനം പൂർത്തിയാക്കി. കോർപറേഷൻ റാലിയിലും പൊതുസമ്മേളനത്തിലും പങ്കെടുക്കാൻ സിപിഐ എം പൊളിറ്റ്‌ബ്യൂറോ അംഗവും മുഖ്യമന്ത്രിയുമായ പിണറായി വിജയൻ നാലിന്‌ കൊല്ലത്ത്‌ എത്തുന്നതോടെ എൽഡിഎഫ്‌ പ്രചാരണവും ആവേശവും പതിമടങ്ങാകും. കൊല്ലം കന്റോൺമെന്റ്‌ മൈതാനത്താണ് റാലിയും പൊതുസമ്മേളനവും നടക്കുന്നത്‌. എൽഡിഎഫ്‌ ഡിവിഷൻ റാലിയും പൊതുസമ്മേളനങ്ങളും പുരോഗമിക്കുന്നു. തെരഞ്ഞെടുപ്പ്‌ കമ്മിറ്റി ഓഫീസും തുറന്നു. യുഡിഎഫ്‌ കൺവൻഷൻ പൊളിഞ്ഞതിനെ തുടർന്ന്‌ പ്രകടന പത്രിക പ്രകാശനചടങ്ങ്‌ സംഘടിപ്പിച്ചത്‌. കെ സി വേണുഗോപാൽ എംപി പങ്കെടുത്ത 150ല്‍ താഴെ ആളുകൾ മാത്രം. യുഡിഎഫ്‌ റിബലുകൾ ശക്തമായി രംഗത്തുണ്ട്‌. കോയിക്കലിൽ യുഡിഎഫ്‌ സ്ഥാനാർഥിക്കെതിരെ കോൺഗ്രസ്‌ കമ്മിറ്റികൾ ഒന്നടങ്കം രംഗത്തെത്തി. റിബൽ സ്ഥാനാർഥി മീനുലാൽ വളരെ സജീവമാണ്‌. കിളികൊല്ലൂരിൽ കോൺഗ്രസ്‌ മണ്ഡലം കമ്മിറ്റിയുടെ പരിധിയിൽ വരുന്ന കരിക്കോട്‌, കോളേജ്‌, കിളികൊല്ലൂർ ഡിവിഷനുകളിലെ യുഡിഎഫ്‌ സ്ഥാനാർഥികൾക്കെതിരെയാണ്‌ നേതാക്കളെല്ലാം. മണ്ഡലം പ്രസിഡന്റ്‌ അസിമുദീൻ, ബ്ലോക്ക്‌ വൈസ്‌ പ്രസിഡന്റ്‌ സക്കീർ ഹുസൈൻ എന്നിവരുൾപ്പെടെ നേതൃത്വത്തിന്റെ ഏകപക്ഷീയ തീരുമാനങ്ങൾക്കെതിരെ പരസ്യമായി രംഗത്തുണ്ട്‌. കൊല്ലൂർവിളയിൽ യുഡിഎഫ്‌ സ്ഥാനാർഥിക്ക്‌ റിബലായി മത്സരരംഗത്തുള്ളത്‌ മുൻ ക‍ൗൺസിലർ ഹംസത്ത്‌ബീവിയാണ്‌. വടക്കേവിളയിലെ യുഡിഎഫ്‌ റിബൽ സ്ഥാനാർഥി സിദ്ധാർഥ്‌ കോൺഗ്രസ്‌ ബ്ലോക്ക്‌ വൈസ്‌ പ്രസിഡന്റാണ്‌. ആർഎസ്‌പിക്ക്‌ അനുവദിച്ച സീറ്റുകളിൽ രണ്ടിടത്ത്‌ കോൺഗ്രസ്‌ പ്രവർത്തകരെ സ്ഥാനാർഥികളായി അടിച്ചേൽപ്പിച്ച നടപടിയിൽ ആർഎസ്‌പിയും പുകയുകയാണ്‌. ലീഗിന്‌ അനുവദിച്ച നാലിൽ രണ്ടിടത്തും കോൺഗ്രസുകാരാണ്‌ സ്ഥാനാർഥികൾ. ബിജെപി വർഗീയതയിൽ കേന്ദ്രീകരിച്ചിരിക്കുകയാണ്‌. വികസനം പ്രചാരണമാക്കിയിട്ടുള്ളത്‌ എൽഡിഎഫ്‌ മാത്രമാണ്‌.