മ‍ൗനം പാലിച്ച്‌ കേന്ദ്രം

കൊല്ലം

നീണ്ടകരയിൽ കോസ്റ്റ്ഗാർഡ്‌ യൂണിറ്റ്‌ സ്ഥാപിക്കുന്നതിന്‌ സാധ്യതാപഠനം ഉൾപ്പെടെ നടത്തിയിട്ടും മ‍ൗനം പാലിച്ച്‌ കേന്ദ്രസർക്കാർ. ആലപ്പുഴ, കൊല്ലം ജില്ലകൾക്കായി നീണ്ടകരയിൽ പ്രതിരോധ മന്ത്രാലയത്തിനു കീഴിലുള്ള കോസ്റ്റ് ഗാർഡ് യൂണിറ്റ് വേണമെന്ന വർഷങ്ങളായുള്ള ആവശ്യത്തോടാണ്‌ കേന്ദ്രം മുഖംതിരിക്കുന്നത്. സുശക്തമായ തീരസുരക്ഷാ പദ്ധതിയുടെ ഭാഗമായാണ് കോസ്റ്റ്ഗാർഡ്‌ ഉന്നത ഉദ്യോഗസ്ഥർ ആറുമാസം മുന്പ്‌ നീണ്ടകരയിൽ സാധ്യതാപഠനം നടത്തിയത്‌. കേരളത്തിൽ ഏറ്റവും കൂടുതൽ യന്ത്രവൽകൃത ബോട്ടുകൾ കടലിൽപോകുന്നത്‌ നീണ്ടകര അഴിമുഖം കേന്ദ്രീകരിച്ചാണ്‌. കാലാവസ്ഥാ വ്യതിയാനം കാരണം മീൻപിടിത്ത ബോട്ടും വള്ളവും അപകടത്തിൽപ്പെടുന്നത്‌ പതിവാണ്‌. മത്സ്യത്തൊഴിലാളികളുടെ സുരക്ഷ, സംരക്ഷണം, സഹായം, തീരദേശ പട്രോളിങ്, സമുദ്രാതിർത്തി സംരക്ഷണം, സമുദ്രത്തിലെ തിരച്ചില്‍, രക്ഷാപ്രവർത്തനം തുടങ്ങിയ ഉത്തരവാദിത്വങ്ങൾ കോസ്റ്റ് ഗാർഡിനുണ്ടെങ്കിലും യൂണിറ്റില്ലാത്തതിനാൽ കാലതാമസം നേരിടുന്നുണ്ട്‌. കൊല്ലം, ആലപ്പുഴ ജില്ലകളിൽ മത്സ്യത്തൊഴിലാളികൾ അപകടത്തിൽപ്പെട്ടാൽ രക്ഷയ്ക്കായി കൊച്ചി, വിഴിഞ്ഞം എന്നിവിടങ്ങളിൽ നിന്നാണ് കോസ്റ്റ് ഗാർഡ് ടീം എത്തുന്നത്. നീണ്ടകരയിൽനിന്ന് ഇതരസംസ്ഥാന തൊഴിലാളികളായ പതിനായിരങ്ങളാണ്‌ കടലിൽ പോകുന്നത്‌. കയറ്റുമതി കന്പനികൾ, ഐസ്‌ പ്ലാന്റ്‌, ചെമ്മീൻ പീലിങ്‌ ഷെഡുകൾ എന്നിവ കേന്ദ്രീകരിച്ചും ഇതരസംസ്ഥാനക്കാരാണ്‌ പ്രവർത്തിക്കുന്നത്‌. അടുത്തിടെ മീന്‍പിടിത്ത ജോലിയില്‍ ഏർപ്പെട്ടിരുന്ന ബംഗ്ലാദേശി പൗരനെ ശക്തികുളങ്ങര പൊലീസ് അറസ്റ്റ് ചെയ്തിരുന്നു. ഇതടക്കമുള്ള സുരക്ഷാ പ്രശ്‌നങ്ങളുമുണ്ട്‌. കൊല്ലം തീരം കേന്ദ്രീകരിച്ച്‌ മനുഷ്യക്കടത്തുമായി ബന്ധപ്പെട്ടും ബോട്ടുകൾ പിടിയിലായിട്ടുണ്ട്‌. വെള്ള കളർകോഡുണ്ടായിരുന്ന ബോട്ട്‌ ഉൾക്കടലിൽ വച്ച്‌ നീല പെയിന്റടിച്ച്‌ നീണ്ടകര തുറമുഖത്ത്‌ കയറിയത്‌ കഴിഞ്ഞ ആഴ്‌ചയായിരുന്നു. വിവരമറിഞ്ഞ്‌ വിഴിഞ്ഞം, കൊച്ചി സ്‌റ്റേഷനിൽനിന്ന് ഡ്രോണിയർ അടക്കമുള്ള വിമാനങ്ങൾ ഒരു പകൽ മുഴുവൻ കടൽ അരിച്ചുപെറുക്കിയിരുന്നു. രാജ്യത്താകെ അഞ്ച് കോസ്റ്റ്ഗാർഡ് മേഖലകളിലായി 42 സ്റ്റേഷനും അഞ്ച് എയർ സ്റ്റേഷനും 10 എയർ എൻക്ലേവുകളുമാണുള്ളത്. നിലവിൽ മുംബൈ ആസ്ഥാനമായ പശ്ചിമമേഖലയുടെ കീഴിലെ കൊച്ചി ആസ്ഥാനമായ നാലാം ഡിസ്ട്രിക് ഹെഡ് ക്വർട്ടേഴ്സിന്റെ പരിധിയിലാണ് സംസ്ഥാനത്തെ വിഴിഞ്ഞം, ബേപ്പൂർ, കൊച്ചി സ്റ്റേഷനുകൾ പ്രവർത്തിക്കുന്നത്. നുഴഞ്ഞുകയറ്റ സാധ്യത ഉൾപ്പെടെയുള്ള വെല്ലുവിളി ഒഴിവാക്കാനും രക്ഷാപ്രവർത്തനത്തിലെ കാലതാമസം ഒഴിവാക്കാനും നീണ്ടകരയിൽ അടിയന്തരമായി സ്റ്റേഷൻ സ്ഥാപിക്കണമെന്നാണ് മത്സ്യത്തൊഴിലാളികളും ബോട്ടുടമകളുംആവശ്യപ്പെടുന്നത്.