മഹിമപേറി വെളിനല്ലൂർ

ഓയൂർ

ഇത്തിക്കരയാർ ഒഴുകുന്ന താളവും വലിയ കുന്നിന്റെ കാറ്റും. കാളവയൽ വാണിഭത്തിന്റെ ഐതീഹ്യ പെരുമയും ശ്രീരാമക്ഷേത്രത്തിന്റെ മുറ്റത്ത് മീന്‍കച്ചവടം നടത്തുവാൻ അനുവദിക്കുന്ന മഹത്വവും കാത്തുസൂക്ഷിക്കുന്നതാണ് വെളിനല്ലൂരിന്റെ മണ്ണ്. വെളിച്ചമുള്ളവരുടെ ഊരായ വെളിനല്ലൂര്‍ പഞ്ചായത്തിന് എന്നും ഇടത് മനസ്സാണ്. 17 ഡിവിഷനുള്ള പഞ്ചായത്തിൽ ഇത്തവണ രണ്ട് വാർഡ് കൂടി വർധിച്ചു. പൊതുസ്വീകാര്യതയും അനുഭവസമ്പത്തും യുവത്വവും മികച്ച വനിതാ പ്രവർത്തകരെയും കൊണ്ട് ശ്രദ്ധേയമാണ് ഇടത് സ്ഥാനാർത്ഥി പട്ടിക. സംസ്ഥാന സർക്കാരും ത്രിതല പഞ്ചായത്തും നടപ്പാക്കിയ വികസനനേട്ടങ്ങൾ നിരത്തിയാണ് ഇടതുമുന്നണി വോട്ട് തേടുന്നത്. പഞ്ചായത്തിലെ കുടിവെള്ള പ്രശ്നം കീറാമുട്ടിയായിരുന്നു. ആറ്റൂർ കോണത്ത് ഇത്തിരക്കരയാറിന് കുറുകെ ചെക്ക് ഡാം നിർമിച്ച് ജലം ശേഖരിച്ച് ഫില്‍റ്റർ വഴി ശുദ്ധീകരിച്ച് വിതരണം ചെയ്തതോടെ ഇതിനു പരിഹാരമായി. ചെക്ക് ഡാം സന്ദർശിക്കാൻ എത്തുന്നവരെ മുന്നിൽക്കണ്ട് വമ്മീം കയം കേന്ദ്രീകരിച്ച് കുട്ടവഞ്ചി സവാരി ആരംഭിച്ചത് വിനോദ സഞ്ചാരമേഖലയ്ക്ക് മുതല്‍ക്കൂട്ടായി. അംഗണവാടികൾക്കും സ്കൂളുകൾക്കും സർക്കാർ ഓഫീസുകൾക്കും കെട്ടിടങ്ങൾ നിർമിച്ചുനൽകുകയും മറ്റുള്ളവ നവീകരിക്കുകയുംചെയ്തു. രാജീവ് ഗാന്ധി സെന്റർ ഫോർ ബയോളജി ആന്‍ഡ് ടെക്നോളജി മൾട്ടി സ്പെഷ്യാലിറ്റി ലാബ് ഓയൂരിൽ ആരംഭിച്ചതടക്കം എണ്ണിയാൽ ഒടുങ്ങാത്ത വികസനപ്രവൃത്തികള്‍ നടപ്പാക്കി. യുഡിഎഫ് ക്യാമ്പ് വിമതശല്യത്താൽ ആശങ്കയിലാണ്. റോഡുവിള, പാപ്പാലോട്, മിയ്യന വാർഡുകളിൽ വിമതപ്പടയാണ്. ബിജെപിയിൽ പ്രധാന നേതാക്കൾക്ക് സീറ്റ് ലഭിക്കാത്തതിനെ തുടർന്നുള്ള അസ്വസ്ഥതകളും പ്രതിഫലിക്കും.