ഇടത് കരുതൽ തുടരാൻ കരീപ്ര

എഴുകോൺ

രൂപീകരണ കാലം മുതൽ എൽഡിഎഫിനൊപ്പം നിൽക്കുന്ന കരീപ്രയിൽ ഇത്തവണയും ചെങ്കൊടി പാറും. കരുതലിന്റെയും പങ്കുവയ്ക്കലിന്റെയും സന്ദേശമുയർത്തി കരീപ്രയിൽ നടത്തിയ വികസന നേട്ടങ്ങൾ എൽഡിഎഫിന് വീണ്ടും വഴി തുറക്കും. പുതുതായി രൂപീകരിച്ച ഭരണിക്കാവ് വാർഡ് ഉൾപ്പെടെ 19 വാർഡാണുള്ളത്. നിലവിൽ എൽഡിഎഫ് -13, യുഡിഎഫ് -2, ബിജെപി -3 എന്നതാണ് കക്ഷിനില. ജില്ലയുടെ നെല്ലറയെന്ന് വിശേഷിപ്പിക്കാവുന്ന കരീപ്രയിൽ തരിശുകിടന്ന എല്ലാ ഏലാകളിലേക്കും നെൽക്കൃഷിയിറക്കിയത് ഉൾപ്പെടെ കാർഷിക മേഖലയിൽ നടത്തിയിട്ടുള്ള വികസന പ്രവർത്തനങ്ങളും ആദ്യമായി നടപ്പാക്കിയ ഹരിത തീർഥം പദ്ധതിയും പ്രഥമ ആയുഷ് കായകൽപ്പ് പുരസ്‌കാരം കരീപ്ര ഗവ. ആയുർവേദ ഡിസ്‌പെസറി നേടിയതും ലൈഫ് പദ്ധതിയിൽ 210 വീടും അതിദരിദ്ര പട്ടികയിലുള്ള മൂന്ന് വീടും പിഎംഎവൈ പദ്ധതിയിൽ 24 വീടും നൽകിയതും ഹരിതസമൃദ്ധി പഞ്ചായത്ത് നേട്ടവും എല്ലാ വീട്ടിലും കുടിവെള്ളമെത്തിച്ചതും കാർബൺ ന്യൂട്രൽ പഞ്ചായത്തായതും ഉൾപ്പെടെ എണ്ണമറ്റ വികസന പ്രവർത്തനമാണ് പഞ്ചായത്ത് ഭരണസമിതി നടപ്പാക്കിയത്. ധനമന്ത്രി കെ എൻ ബാലഗോപാലിന്റെ ശ്രമഫലമായി നടപ്പാക്കിയ നെടുമൺകാവ് ഷോപ്പിങ്‌ കോംപ്ലക്സും കുഴിമതിക്കാടും മിനിസ്റ്റേഡിയവും നെടുമൺകാവ് അറക്കടവ്, ശാസ്താംകടവ്, കൽച്ചിറ പാലങ്ങളും ഗ്രാമീണ റോഡും ദേശീയപാത നിലവാരത്തിൽ ഉയർത്തിയതും പ്രധാന നേട്ടമാണ്. പല വാർഡിലും കോൺഗ്രസും ബിജെപിയും പരസ്പര സഹായ മുന്നണിയാണ്‌. ബിജെപി കഴിഞ്ഞതവണ വാർഡുകളിൽ യുഡിഎഫ് ബഹുദൂരം പിന്നിലായി മൂന്നാം സ്ഥാനത്താണ് എത്തിയത്. കോൺഗ്രസ് ജയിച്ച വാർഡിൽ ബിജെപിയുടെ അവസ്ഥയും ഇതുതന്നെയായിരുന്നു. എന്നാൽ, ഇത്തവണ എല്ലാ അവിശുദ്ധ കൂട്ടുകെട്ടുകളെയും പരാജയപ്പെടുത്തി ജയിക്കുന്നതിനുള്ള പ്രവർത്തനങ്ങൾ എൽഡിഎഫ് ശക്തമായി നടത്തുന്നുണ്ട്. കഴിഞ്ഞതവണ നഷ്ടപ്പെട്ട വാർഡ് കൂടി നേടിയെടുത്ത ഭരണം നിലനിർത്തുമെന്നുള്ള ആത്മവിശ്വാസത്തിലാണ് എൽഡിഎഫ്.