ഹോർമുസ് തുറക്കാൻ ധാരണ; ഒമാനുമായി അന്തിമഘട്ട ചർച്ചയിൽ ഇറാൻ

തെഹ്റാൻ : ഹോർമുസ് കടലിടുക്കിലൂടെയുള്ള കപ്പൽ ​ഗതാ​ഗതം പുനരാരംഭിക്കുന്നതിനായി ഒമാനുമായി ധാരണയിലെത്തിയെന്ന് ഇറാൻ. കപ്പലുകൾ സഞ്ചരിക്കേണ്ട പാതയുടെ ഭൂമിശാസ്ത്രപരമായ അതിരുകൾ സംബന്ധിച്ച് ഒമാനുമായി തീരുമാനമായി, കരാർ അന്തിമഘട്ടത്തിലാണ് ഇറാൻ വിദേശകാര്യ വക്താവ് ഇസ്മായിൽ ബ​ഗായ് വ്യക്തമാക്കി. എന്നിരുന്നാലും ഹോർമുസിലൂടെ ​സുരക്ഷിതമായ ​ഗതാ​ഗതം ഉറപ്പാക്കണമെങ്കിൽ ഇറാന്റെ തുറമുഖങ്ങൾക്ക് മേലുള്ള ന്യായമല്ലാത്ത യുഎസ് ഉപരോധം പിൻവലിക്കണമെന്നും ബ​ഗായ് മുന്നറിയിപ്പ് നൽകി.

ഫെബ്രുവരിയിലാണ് അമേരിക്ക - ഇസ്രയേൽ സഖ്യം ഇറാനെതിരെ കടന്നാക്രമണം ആരംഭിച്ചത്. ഇതോടെ ലോകത്തെ അസംസ്കൃത എണ്ണയുടെയും എൽഎൻജിയുടെയും അഞ്ചിലൊന്ന് കടന്നുപോകുന്ന ഹോർമുസ് കടലിടുക്ക് സുരക്ഷ മുൻനിർത്തി ഇറാൻ അടച്ചു. അതിനുശേഷം ആ​ഗോളതലത്തിൽ ക്രൂഡ് ഓയിൽ വില കുത്തനെ വർധിച്ചു.

അതേസമയം ഹോർമുസ് കടലിടുക്ക് വേ​ഗം തുറന്നില്ലെങ്കിൽ ഇറാന് വളരെ വലിയ പ്രത്യാഘാതങ്ങൾ നേരിടേണ്ടി വരുമെന്ന് ട്രംപ് ചൊവ്വാഴ്ച വീണ്ടും യുദ്ധഭീഷണി മുഴക്കി. കയറ്റുമതി പുനരാരംഭിക്കുന്ന ചർച്ചകൾ പുരോ​ഗമിക്കുകയാണെന്ന മുതിർന്ന യുഎസ് ഉദ്യോ​ഗസ്ഥർ കഴിഞ്ഞയാഴ്ച പ്രതികരിച്ചിരുന്നു. ഇതിന് പിന്നാലെയാണ് ട്രംപിന്റെ ഭീഷണി. എന്നാൽ അമേരിക്കയുമായി യാതൊരു ചർച്ചക്കും തയ്യാറാല്ലെന്ന ഉറച്ച നിലപാടിലാണ് ഇറാൻ.

ഒമാനുമായി തീരുമാനിച്ചിരിക്കുന്ന പുതിയ കപ്പൽപാത താൽക്കാലികമായിരിക്കും. 2-3 മാസം വരെ ഈ പാത തുറന്നിട്ടേക്കുമെന്നും ഇറാൻ ഡെപ്യൂട്ടി വിദേശകാര്യ മന്ത്രി കാസിം ​ഗാരിബാദി വ്യക്തമാക്കി. പുതിയ പാതയുടെ വലിയ ഭാ​ഗം കടന്നു പോകുന്നത് ഇറാനിലൂടെയാണ്. മറ്റു ഭാ​ഗങ്ങൾ ഒമാനിലുമാണ്. കരാർ അന്തിമമായാൽ കപ്പൽ കടക്കുന്നതിന് 5 മുതൽ 7 ശതമാനം ഫീസ് ഈടാക്കുമെന്ന് ഇറാൻ വ്യക്തമാക്കിയിട്ടുണ്ട്. ഒമാൻ 3 ശതമാനം ഫീസും ഏർപ്പെടുത്തിയേക്കും.