അമേരിക്കൻ- ഇസ്രയേൽ ആക്രമണം: 56 മ്യൂസിയങ്ങളും ചരിത്ര സ്മാരകങ്ങളും തകർന്നുവെന്ന് ഇറാൻ

തെഹ്റാൻ: ഇറാനെതിരെയുള്ള അമേരിക്കൻ- ഇസ്രയേൽ ആക്രമണം 15ാം ദിവസത്തിലും തുടരുകയാണ്. ആക്രമണങ്ങളിൽ രാജ്യത്തുടനീളമുള്ള 56 മ്യൂസിയങ്ങളും ചരിത്ര സ്മാരകങ്ങളും തകർന്നതായി ഇറാന്റെ സാംസ്കാരിക പൈതൃക, ടൂറിസം മന്ത്രാലയം അറിയിച്ചു. ഏറ്റവും കൂടുതൽ നാശനഷ്ടങ്ങൾ സംഭവിച്ചത് തെഹ്റാനിലാണ്. 19 ഇടങ്ങളിലാണ് നാശനഷ്ടങ്ങൾ റിപ്പോർട്ട് ചെയ്തത്.

സംഘർഷത്തിന്റെ ആദ്യ ദിവസങ്ങളിൽ തെഹ്റാനിലുണ്ടായ അമേരിക്കൻ- ഇസ്രയേൽ സംയുക്ത മിസൈൽ ആക്രമണത്തിൽ ഗോലെസ്ഥാൻ കൊട്ടാരത്തിൽ കേടുപാടുകൾ സംഭവിച്ചു. ഇറാനിയൻ തലസ്ഥാനത്തെ ഏറ്റവും പഴക്കം ചെന്ന സ്ഥലങ്ങളിൽ ഒന്നായ കൊട്ടാരം യുനെസ്കോയുടെ പട്ടികയിൽ ഉൾപ്പെട്ടിട്ടുണ്ട്. ഒരുകാലത്ത് ഖജർ രാജവംശത്തിന്റെ വസതിയായിരുന്നു.

മധ്യ ഇറാനിയൻ നഗരമായ ഇസ്ഫഹാനിൽ പതിനേഴാം നൂറ്റാണ്ടിലെ വാസ്തുവിദ്യാ വിസ്മയമായ നാഗ്ഷെ-ഇ ജഹാൻ സ്ക്വയറും തകർന്നു. ബുഷെർ പ്രവിശ്യയിലെ സിറാഫ് തുറമുഖത്ത്, നൂറ്റാണ്ടുകൾ പഴക്കമുള്ള നിരവധി കെട്ടിടങ്ങൾ സ്ഥിതി ചെയ്യുന്ന ചരിത്രപരമായ പാദത്തിൽ നിരവധി വീടുകൾക്ക് കേടുപാടുകൾ സംഭവിച്ചു.

ഇറാനിലെ ബുഷെർ പ്രവിശ്യയിലുള്ള പുരാതനമായ സിറാഫ് തുറമുഖത്ത് നാശനഷ്ടം. നൂറ്റാണ്ടുകൾ പഴക്കമുള്ള ചരിത്രപരമായ പൈതൃക മേഖലയിൽ സ്ഥിതി ചെയ്യുന്ന നിരവധി വീടുകൾ തകർന്നു. മേഖലയിലെ പുരാതന കെട്ടിടങ്ങൾക്കും കാര്യമായ കേടുപാടുകൾ സംഭവിച്ചിട്ടുണ്ട്.

നൂറ്റാണ്ടുകളുടെ ചരിത്രമുറങ്ങുന്ന പൈതൃക സ്മാരകങ്ങൾ തകർന്നത് വലിയ ആശങ്കയ്ക്ക് ഇടയാക്കിയിട്ടുണ്ട്. ഇറാൻ, ഇസ്രയേൽ, ലെബനൻ എന്നിവിടങ്ങളിലെ നൂറുകണക്കിന് ചരിത്ര സ്ഥലങ്ങൾക്ക് യുദ്ധം മൂലം കേടുപാടുകൾ സംഭവിച്ചതിലും തകർച്ചാ ഭീഷണി നേരിടുന്നതിലും ആശങ്കയുണ്ടെന്ന് യുഎന്നിന്റെ സാംസ്കാരിക ഏജൻസിയായ യുനെസ്കോ പറഞ്ഞു.