​ഗ്യാനേഷിന്റെ രാജിക്കായി പ്രതിപക്ഷം വീണ്ടും സമരമുഖത്ത്; എംപിമാരുടെ ബസുകൾ ജന്തർമന്തറിലേക്ക്

ന്യൂഡൽഹി: രാജ്യത്തെ ജനാധിപത്യ അവകാശങ്ങളെ കശാപ്പുചെയ്‌ത മുഖ്യ തെരഞ്ഞെടുപ്പ്‌ കമീഷണർ ഗ്യാനേഷ്‌കുമാറിന്റെ രാജി ആവശ്യപ്പെട്ട്‌ ഡൽഹിയിൽ പ്രതിഷേധം കടുക്കുന്നു. പ്രതിപക്ഷ എംപിമാർ ബസുകളിൽ ജന്തർ മന്തറിലേക്ക് പുറപ്പെട്ടു. എന്നാൽ പ്രതിഷേധം അടിച്ചമർത്തുന്നതിനായി വൻ പൊലീസ് സേനയെയാണ് കേന്ദ്രസർക്കാർ വിന്യസിച്ചിരിക്കുന്നത്. ഐടിബിപിയെയും ആർഎഎഫിനെയും ഉപയോ​ഗിച്ച് എംപിമാരെ തടയാനാണ് നീക്കം.

ജന്തർമന്തറിലേക്കുള്ള പ്രധാന റോഡുകളെല്ലാം അടച്ചു. പൊലീസ് വിന്യാസത്തെ മറികടന്ന് സമരസ്ഥലത്ത് എത്തുമെന്ന് എംപിമാർ പ്രഖ്യാപിച്ചു. ഇടതുപക്ഷ എംപിമാരായ ജോൺ ബ്രിട്ടാസ്‌, വി ശിവദാസൻ, എ എ റഹിം, പി സന്തോഷ്കുമാര്‍, ലോക്‌സഭാ പ്രതിപക്ഷ നേതാവ്‌ രാഹുൽ ഗാന്ധി, രാജ്യസഭാ പ്രതിപക്ഷ നേതാവ്‌ മല്ലികാർജുൻ ഖാർഗെ തുടങ്ങിയവർ ബസുകളിലുണ്ട്.

​ഗ്യാനേഷിന്റെ രാജിയില്ലാതെ സമരത്തിൽനിന്ന് പിന്മാറില്ലെന്നാണ് പ്രതിപക്ഷനിലപാട്. കഴിഞ്ഞദിവസം നടന്ന എംപിമാരുടെ സമരത്തിനെ പൊലീസ്‌ അതിക്രൂരമായാണ് നേരിട്ടത്.