അരുണാചലിൽ മണ്ണിടിച്ചിലിലും വെള്ളപ്പൊക്കവും: ഒമ്പത് മരണം

ഇറ്റാന​ഗർ : കനത്ത മഴയെത്തുടർന്ന് അരുണാചൽ പ്രദേശിലുണ്ടായ വെള്ളപ്പൊക്കത്തിലും മണ്ണിടിച്ചിലിലും 9 മരണം. കഴിഞ്ഞ കുറച്ച് ദിവസങ്ങളായി പ്രദേശത്ത് കനത്ത മഴ തുടരുകയാണ്. ഇതേത്തുടർന്ന് നിരവധി ജില്ലകളിൽ വെള്ളപ്പൊക്കവും മണ്ണിടിച്ചിലുമുണ്ടായിരുന്നു. ഈസ്റ്റ് കമെങ് ജില്ലയിൽ വ്യാഴാഴ്ച രാത്രി ദേശീയപാത 13ലെ ബന-സെപ്പ മേഖലയിൽ ഉണ്ടായ വൻ മണ്ണിടിച്ചിലിൽ വാഹനം ഒലിച്ചു പോയാണ് ഏഴ് പേർ മരിച്ചത്.

സെപ്പയിലേക്ക് പോവുകയായിരുന്ന വാഹനം തുടർച്ചയായ മഴയെത്തുടർന്നുണ്ടായ മണ്ണിടിച്ചിലിൽ പെട്ടെന്നുള്ള മണ്ണിടിച്ചിലിൽ ആഴത്തിലുള്ള കൊക്കയിലേക്ക് മറിയുകയായിരുന്നു. രക്ഷാപ്രവർത്തനങ്ങൾ ഉടനടി ആരംഭിച്ചെങ്കിലും പേമാരിയും വീണ്ടും മണ്ണിടിച്ചിലുണ്ടായതും ദൃശ്യപരത വളരെ കുറവായതും രക്ഷാപ്രവർത്തനങ്ങളെ സാരമായി ബാധിച്ചു. ശനിയാഴ്ച ഗ്രാമീണരുടെ സഹായത്തോടെ രക്ഷാപ്രവർത്തനം പുനരാരംഭിച്ചു. മണിക്കൂറുകൾ നീണ്ട തിരച്ചിലിനുശേഷം, ഹൈവേയിൽ നിന്ന് ഏകദേശം 150 മീറ്റർ താഴെയാണ് വാഹനത്തിന്റെ അവശിഷ്ടങ്ങൾ കണ്ടെത്തിയത്. ഏഴ് യാത്രക്കാരെയും അകത്ത് മരിച്ച നിലയിൽ കണ്ടെത്തിയെന്നും പൊലീസ് പറഞ്ഞു. രണ്ട് കുടുംബങ്ങളിൽ നിന്നുള്ളവരാണ് അപകടത്തിൽപ്പെട്ടത്. എല്ലാവരും ബാനയിലെ കിച്ചാങ് ഗ്രാമവാസികളായിരുന്നുവെന്ന് ഈസ്റ്റ് കാമെങ് പോലീസ് സൂപ്രണ്ട് (എസ്പി) കാംദം സികോം പറഞ്ഞു.

ലോവർ സുബൻസിരി ജില്ലയിൽ സിറോ-കാംലെ റോഡരികിലെ പൈൻ ഗ്രൂവ് പ്രദേശത്തിനടുത്തുള്ള ഒരു കാബേജ് ഫാമിലുണ്ടായ മണ്ണിടിച്ചിലിൽ രണ്ട് തൊഴിലാളികൾ കൊല്ലപ്പെട്ടു. രണ്ട് പേരെ രക്ഷപ്പെടുത്തി. റാൻ പോളിയൻ കാബേജ് ഫാമിൽ വ്യാഴാഴ്ച രാത്രി വൈകിയാണ് സംഭവം നടന്നതെന്ന് ലോവർ സുബൻസിരി ഡെപ്യൂട്ടി പോലീസ് സൂപ്രണ്ട് (ഡിഎസ്പി) ഓജിംഗ് ലെഗോ പറഞ്ഞു.

കനത്ത മഴയെത്തുടർന്ന് നിരവധി നാശനഷ്ടങ്ങളാണ് അരുണാചൽ അടക്കമുള്ള വടക്കുകിഴക്കൻ സംസ്ഥാനങ്ങളിലുണ്ടായത്. കനത്ത മഴയെ തുടർന്ന് അരുണാചലിലെ അപ്പർ സുബൻസിരി ജില്ലയിൽ വെള്ളപ്പൊക്കമുണ്ടായി. ഇത് നൂറിലധികം കുടുംബങ്ങളെ ബാധിച്ചു. തുടർച്ചയായ മഴയിൽ സിഗിൻ നദി കരകവിഞ്ഞൊഴുകിയതോടെ നിരവധി താമസസ്ഥലങ്ങൾ വെള്ളത്തിനടിയിലായി. ജില്ലാ ആസ്ഥാനമായ ഡാപോറിജോയിൽ വെള്ളപ്പൊക്കത്തിൽ വ്യാപകമായ നാശനഷ്ടമുണ്ടായി. നിരവധി താഴ്ന്ന പ്രദേശങ്ങൾ വെള്ളത്തിനടിയിലായി.

സിഗിൻ-1, സിഗിൻ-2, സിഗിൻ-3, സിനിക്ക് കോളനി, പോളോ കോളനി, തിക്രെ കോളനി, ശ്മശാന പ്രദേശം എന്നിവിടങ്ങളിലാണ് കൂടുതൽ നാശനഷ്ടമുണ്ടായത്. കനത്ത മഴ തുടരുന്ന സാഹചര്യത്തിൽ ജനങ്ങൾ മുൻകരുതലുകൾ എടുക്കണമെന്നും താഴ്ന്ന പ്രദേശങ്ങളിൽ പോകുന്നത് ഒഴിവാക്കണമെന്നും ജില്ലാ ഭരണകൂടം മുന്നറിയിപ്പ് നൽകിയിട്ടുണ്ട്.