"ഞങ്ങള്‍ക്ക് വീടുകളിലേക്ക് മടങ്ങണം': മണിപ്പുര്‍ രാജ്ഭവന് മുന്നില്‍ പ്രതിഷേധം

ഇംഫാൽ : കലാപത്തെ തുടര്‍ന്ന് രണ്ടുവര്‍ഷത്തോളമായി ജന്മനാട്ടില്‍നിന്ന്‌ ആട്ടിയിറക്കപ്പെട്ട നൂറുകണക്കിനാളുകള്‍ വീടുകളിലേക്ക് മടങ്ങാൻ അവസരമുണ്ടാക്കണമെന്നാവശ്യപ്പെട്ട് മണിപ്പുര്‍ രാജ്ഭവന് മുന്നില്‍ പ്രതിഷേധിച്ചു. 2023 മെയ് മാസത്തിൽ വംശീയ അതിക്രമം പൊട്ടിപ്പുറപ്പെട്ടതോടെ ചുരാചന്ദ്പുർ, കാങ്‌പോക്പി, ഇംഫാൽ വെസ്റ്റ്, ഇംഫാൽ ഈസ്റ്റ് ജില്ലകളിൽനിന്ന്‌ കുടിയിറക്കപ്പെട്ടവരാണ് "മൗലികാവകാശങ്ങൾ ഉറപ്പാക്കുക" എന്നെഴുതിയ പ്ലക്കാർഡുകളുമായി രാജ്ഭവന്‍ വളഞ്ഞത്. ദുരിതാശ്വാസ ക്യാമ്പുകളിൽ നിന്നെത്തിയ പ്രക്ഷോഭകരെ പോലീസ് തടഞ്ഞു.

"ദുരിതമനുഭവിക്കുന്നവരുടെ ജീവിതത്തിനും പ്രാധാന്യമുണ്ട്" എന്ന മുദ്രാവാക്യമുയർത്തിയാണ്‌ പ്രക്ഷോഭം. മണിപ്പൂരില്‍ എല്ലാം ശാന്തമായെന്ന് പ്രചരിപ്പിക്കാന്‍ ടൂറിസം മേള സംഘടിപ്പിക്കുന്നതിനെ പ്രക്ഷോഭകര്‍ വിമര്‍ശിച്ചു. വാര്‍ഷിക ടൂറിസം മേളയായ സംഗായി ഫെസ്റ്റിവല്‍ ബഹിഷ്‌കരിക്കാനും ആഹ്വാനംചെയ്‌തു. 2022ല്‍ പത്തുലക്ഷം പേര്‍ പങ്കെടുത്ത സംഗായി മേള രണ്ടുവര്‍ഷത്തെ ഇടവേളക്ക്ശേഷം സര്‍ക്കാര്‍ കൊട്ടിഘോഷിച്ച് ആരംഭിച്ചെങ്കിലും ജനപങ്കാളിത്തം കുറവാണ്.

നവംബര്‍21ന് ആരംഭിച്ച മേളയില്‍ ഇതുവരെ എത്തിയത്‌ ആയിരത്തോളം പേര്‍ മാത്രം. വംശീയ അതിക്രമങ്ങളിൽ 260-ലധികംപേര്‍ കൊല്ലപ്പെട്ടെന്നാണ് ഔദ്യോഗിക കണക്ക്. ആയിരക്കണക്കിന് ആളുകൾക്ക് വീട് നഷ്‌ടമായി. രണ്ടുവര്‍ഷം പിന്നിട്ടിട്ടും സംസ്ഥാനത്ത് സമാധാനവും പരസ്‌പരവിശ്വാസവും വളര്‍ത്താന്‍ കേന്ദ്ര, സംസ്ഥാന സര്‍ക്കാരുകള്‍ക്ക് കഴിഞ്ഞിട്ടില്ല.