മനുഷ്യക്കടത്ത്; ഇന്ത്യക്കാരെ സൈബർ തട്ടിപ്പിനിരയാക്കിയ മുൻ നാവിക ഉദ്യോ​ഗസ്ഥൻ അറസ്റ്റിൽ

ന്യൂഡൽഹി: ഉയർന്ന ശമ്പളമുള്ള ജോലി വാ​ഗ്ദാനം ചെയ്ത് രണ്ട് ഇന്ത്യക്കാരെ സൈബർ തട്ടിപ്പിനായി മനുഷ്യക്കടത്ത് നടത്തിയ മുൻ നാവിക ഉദ്യോ​ഗസ്ഥൻ അറസ്റ്റിൽ.

തായ്ലൻഡിലേക്കും കംബോഡിയയിലേക്കുമാണ് ഇവരെ കടത്തിയത്. സൈബർ തട്ടിപ്പ് കേന്ദ്രങ്ങളിൽ കുടുങ്ങിക്കിടക്കുന്നതായി യുവാക്കൾ വെളിപ്പെടുത്തിയതോടെയാണ് തട്ടിപ്പിനെക്കുറിച്ച് അറിയുന്നത്. മുൻ നാവികസേന ഉദ്യോ​ഗസ്ഥൻ നാ​ഗേഷ് കുമാറാണ് ഈ സൈബർ തട്ടിപ്പ് ​ഗ്യാങ്ങിന്റെ തലവനെന്നാണ് പൊലീസിന്റെ കണ്ടെത്തൽ. ഹിമാചൽ പ്രദേശിൽ നിന്നാണ് നാ​ഗേഷ് കുമാറിനെ പൊലീസ് അറസ്റ്റ് ചെയ്തത്. വിദേശത്ത് നല്ല ജോലി വാ​ഗ്ദാനം ചെയ്ത് ലക്ഷങ്ങളാണ് ഇയാൾ യുവാക്കളിൽ നിന്ന് തട്ടിയതെന്നാണ് റിപ്പോർട്ട്.

അവിടെ എത്തിയാലുടൻ തൊഴിലാളികളെ തടവിലാക്കുകയും സൈബർ കുറ്റകൃത്യങ്ങൾ ചെയ്യാൻ നിർബന്ധിക്കുകയും ചെയ്യുന്നു. സംഭവത്തെ തുടർന്ന് നടത്തിയ അന്വേഷണത്തിൽ നിരവധി ഇന്ത്യക്കാർ ഇത്തരത്തിൽ തട്ടിപ്പിനിരയായതായി വിവരം ലഭിച്ചു.