മുംബൈ വിമാനത്താവളത്തിൽ അഞ്ച് കോടി രൂപയുടെ സ്വർണം പിടികൂടി; ഏഴ് പേർ അറസ്റ്റിൽ

മുംബൈ : മുംബൈ അന്താരാഷ്ട്ര വിമാനത്താവളത്തിൽ വൻ സ്വർണക്കടത്ത് പിടികൂടി. ബംഗ്ലാദേശികളും ശ്രീലങ്കൻ പൗരന്മാരും ഉൾപ്പെട്ട ഒരു സ്വർണ്ണ കള്ളക്കടത്ത് സംഘത്തെ ഡയറക്ടറേറ്റ് ഓഫ് റവന്യൂ ഇന്റലിജൻസ് (ഡിആർഐ) അറസ്റ്റ് ചെയ്തു. 5 കോടി രൂപയുടെ സ്വർണം പിടിച്ചെടുത്തതായും ഉദ്യോഗസ്ഥർ അറിയിച്ചു.

ശൃംഖലയുമായി ബന്ധമുള്ള മൂന്ന് വിമാനത്താവള ജീവനക്കാർ ഉൾപ്പെടെ ഏഴ് പേരെ അറസ്റ്റ് ചെയ്തതായി ഉദ്യോഗസ്ഥർ പറഞ്ഞു. രഹസ്യ വിവരത്തിന്റെ അടിസ്ഥാനത്തിൽ ഡിആർഐ മുംബൈ സോണൽ യൂണിറ്റ് വിമാനത്താവളത്തിൽ "ഓപ്പറേഷൻ ഗോൾഡൻ നെക്സസ്" എന്ന പേരിൽ നടത്തിയ ദൗത്യത്തിലാണ് സ്വർണം പിടികൂടിയത്. വിദേശത്തുനിന്നുള്ള മെഴുക് രൂപത്തിലുള്ള 3.2 കിലോഗ്രാം 24 കാരറ്റ് സ്വർണ്ണപ്പൊടിയാണ് പിടിച്ചെടുത്തത്. ഇതിന് വിപണിയിൽ ഏകദേശം 5 കോടി രൂപ വിലമതിക്കുമെന്ന് ഉദ്യോ​ഗസ്ഥർ പറഞ്ഞു.

മൂന്ന് ട്രാൻസിറ്റ് യാത്രക്കാർ, ഒരു ബംഗ്ലാദേശി പൗരൻ, രണ്ട് ശ്രീലങ്കൻ പൗരന്മാർ എന്നിവരുൾപ്പെടെ ഏഴ് പേരെ ഡിആർഐ കസ്റ്റഡിയിലെടുത്തു. ശരീരത്തിൽ ഒളിപ്പിച്ച നിലയിലാണ് സ്വർണം കടത്താൻ ശ്രമിച്ചത്. വിമാനത്താവളത്തിന് പുറത്ത് സ്വർണ്ണം സ്വീകരിച്ച് പ്രാദേശിക റിസീവറിന് എത്തിക്കാൻ സഹായിച്ചിരുന്ന രണ്ട് ബസ് കോച്ച് ഡ്രൈവർമാരും ഒരു കോച്ച് മോണിറ്ററും ഉൾപ്പെടെ മൂന്ന് വിമാനത്താവള ജീവനക്കാരെയും അറസ്റ്റ് ചെയ്തതായി ഉദ്യോഗസ്ഥർ പറഞ്ഞു. കസ്റ്റംസ് ആക്ട് പ്രകാരം കേസെടുത്ത് കൂടുതൽ അന്വേഷണം നടത്തുന്നുണ്ടെന്ന് ഉദ്യോ​ഗസ്ഥർ വ്യക്തമാക്കി.