പഞ്ചാബിൽ വിഷമദ്യം കഴിച്ച് 14 പേർ മരിച്ചു; ആറുപേർ ​ഗുരുതരാവസ്ഥയിൽ

ചണ്ഡീ​ഗഡ് : പഞ്ചാബിൽ വിഷം കലർന്ന മദ്യം കഴിച്ച് 14 പേർ മരിച്ചു. നിരവധി പേർ ​ഗുരുതരാവസ്ഥയിൽ ചികിത്സയിലാണ്. അമൃത്സറിലെ മജിതയിലാണ് സംഭവമെന്ന് വാർത്താ ഏജൻസി റിപ്പോർട്ട് ചെയ്തു.

ഇന്നലെ രാത്രി 9:30 ഓടെയാണ് വ്യാജ മദ്യം കഴിച്ച് ആളുകൾ മരിക്കുന്നതായി വിവരം ലഭിച്ചതെന്ന് ഉന്നത പൊലീസ് ഉദ്യോ​ഗസ്ഥനായ മനീന്ദർ സിങ് പറഞ്ഞു. 4 പേരെ പിടികൂടിയതായും പ്രധാന വിതരണക്കാരനായ പരബ്ജീത് സിങ്ങിനെ അറസ്റ്റ് ചെയ്തതായും പൊലീസ് പറഞ്ഞു. ചോദ്യം ചെയ്യലിൽ പ്രധാന വിതരണക്കാരനായ സാഹബ് സിങ്ങിനെക്കുറിച്ച് വിവരം ലഭിച്ചതായി പൊലീസ് പറഞ്ഞു.

അഞ്ച് ​ഗ്രാമങ്ങളിലായാണ് ദുരന്തം സംഭവിച്ചത്. നിലവിൽ 14 മരണങ്ങൾ റിപ്പോർട്ട് ചെയ്തതായും ആറു പേർ ​ഗുരുതരാവസ്ഥയിൽ ചികിത്സയിലാണെന്നും പൊലീസ് പറഞ്ഞു. മദ്യത്തിലെ വിഷാംശത്തെപ്പറ്റി പരിശോധനകൾ നടക്കുകയാണെന്നും അതിനു ശേഷമേ വിവരങ്ങൾ പറയാൻ സാധിക്കുവെന്നും പൊലീസ് പറഞ്ഞു. സംഭവത്തിൽ രണ്ട് എഫ്ഐആർ രജിസ്റ്റർ ചെയ്തിട്ടുണ്ട്. ബം​ഗാലി, പതൽപുരി, മരാരി കലാൻ, തെരേവാൽ, തൽവാണ്ടി ഘുമൻ എന്നീ ​ഗ്രാമങ്ങളിലുള്ളവരാണ് മരിച്ചത്.