കോളേജ് ഹോസ്റ്റലിൽ തമിഴ്നാട് മുഖ്യമന്ത്രിയുടെ മിന്നൽ പരിശോധന; ഭക്ഷണത്തിൽ പുഴുവും പ്രാണികളുമെന്ന് പരാതി

ചെന്നൈ: ചെന്നൈ എം സി രാജാ കോളേജ് കോമ്പൗണ്ടിൽ പ്രവർത്തിക്കുന്ന ആദിദ്രാവിഡർ വെൽഫെയർ ഹോസ്റ്റലിൽ തമിഴ്‌നാട് മുഖ്യമന്ത്രി വിജയ് മിന്നൽ പരിശോധന നടത്തി. ഹോസ്റ്റലുകളിലെ അടിസ്ഥാന സൗകര്യങ്ങളെയും ഭക്ഷണ നിലവാരത്തെയും കുറിച്ച് വ്യാപകമായ പരാതികൾ ഉയർന്ന പശ്ചാത്തലത്തിലായിരുന്നു മുഖ്യമന്ത്രിയുടെ നേരിട്ടുള്ള സന്ദർശനം.

പരിശോധനയ്ക്കിടെ ഹോസ്റ്റലിൽ താമസിക്കുന്ന വിദ്യാർത്ഥികൾ തങ്ങൾ നേരിടുന്ന ദുരിതങ്ങൾ മുഖ്യമന്ത്രിക്ക് മുന്നിൽ തുറന്നുപറഞ്ഞു. ഹോസ്റ്റലിൽ നൽകുന്ന ഭക്ഷണത്തിൽ സ്ഥിരമായി പുഴുക്കളെയും പ്രാണികളെയും കണ്ടെത്താറുണ്ടെന്നും, പലപ്പോഴും കഴിക്കാൻ കൊള്ളാത്ത രീതിയിലുള്ള മോശം ഭക്ഷണമാണ് വിതരണം ചെയ്യുന്നതെന്നും വിദ്യാർത്ഥികൾ നേരിട്ട് പരാതിപ്പെട്ടു.

ഭക്ഷണത്തിന്റെ കാര്യത്തിൽ മാത്രമല്ല, ഹോസ്റ്റലിലെ ശുചിമുറികളുടെ അവസ്ഥയും പരിതാപകരമാണെന്ന് വിദ്യാർത്ഥികൾ ചൂണ്ടിക്കാട്ടി. കൃത്യമായ അറ്റകുറ്റപ്പണികൾ നടക്കാത്തതിനാൽ ശുചിമുറികൾ ഉപയോഗശൂന്യമായ അവസ്ഥയിലാണ്. വിദ്യാർത്ഥികളുടെ പരാതികൾ വളരെ ഗൗരവത്തോടെ കേട്ട മുഖ്യമന്ത്രി, ഹോസ്റ്റലിലെ മോശം അവസ്ഥയിൽ ഉദ്യോഗസ്ഥരോട് കടുത്ത രോഷം പ്രകടിപ്പിച്ചു.

അടുക്കളയും ഹോസ്റ്റൽ പരിസരവും നേരിട്ട് വിലയിരുത്തിയ അദ്ദേഹം, ശുചിത്വമില്ലായ്മ ഒട്ടും വച്ചുപൊറുപ്പിക്കാനാകില്ലെന്ന് ഉദ്യോഗസ്ഥർക്ക് മുന്നറിയിപ്പ് നൽകി. വിദ്യാർത്ഥികൾക്ക് ഗുണനിലവാരമുള്ള ഭക്ഷണവും മികച്ച താമസസൗകര്യവും ഉറപ്പാക്കാൻ നടപടികൾ സ്വീകരിക്കണമെന്ന് മുഖ്യമന്ത്രി ബന്ധപ്പെട്ട വകുപ്പ് ഉദ്യോഗസ്ഥർക്ക് കർശന നിർദ്ദേശം നൽകി. ഹോസ്റ്റലുകളുടെ മേൽനോട്ടത്തിൽ വീഴ്ച വരുത്തുന്നവർക്കെതിരെ കർശനമായ അച്ചടക്ക നടപടികൾ സ്വീകരിക്കുമെന്നും അദ്ദേഹം വ്യക്തമാക്കി.