ഗെയിം നിര്‍മാണം മുതൽ അനിമേഷൻ വരെ ; ഇനി പഠനം വേറെ ലെവൽ

തിരുവനന്തപുരം

​നമ്മുടെ കുട്ടികൾ ഇനി സിനിമയ്‌ക്ക്‌ പശ്‌ചാത്തല സംഗീതമൊരുക്കും, അനിമേഷൻ വീഡിയോ നിർമിക്കും, കമ്പ്യൂട്ടർ ഗെയിമുകൾ തയ്യാറാക്കും. രാജ്യത്താദ്യമായി അനിമേഷന്‍, വിഷ്വല്‍ എഫക്ട്സ്, ഗെയിമിങ്‌, കോമിക്സ് (എവിജിസി) സാങ്കതികവിദ്യകൾ പഠിക്കാന്‍ മുഴുവന്‍ കുട്ടികള്‍ക്കും അവസരമൊരുക്കി കേരളം. കഴിഞ്ഞ വര്‍ഷം സംസ്ഥാന സര്‍ക്കാര്‍ പുറത്തിറക്കിയ എവിജിസി–എക്സ്ആര്‍ (എക്സ്റ്റന്റഡ് റിയാലിറ്റി) നയത്തിനനുസൃതമായി കൈറ്റ് തയ്യാറാക്കിയ ഐസിടി പാഠപുസ്തകങ്ങളിലാണ് ഇതിനുള്ള അവസരമുള്ളത്.

മൂന്നാം ക്ലാസിലെ ‘പാട്ടുപെട്ടി’ എന്ന അധ്യായത്തില്‍ സംഗീത സ്വരങ്ങള്‍ കേട്ട് അടിസ്ഥാന സ്വരങ്ങള്‍ തിരിച്ചറിയാന്‍ കുട്ടികള്‍ക്ക് അവസരം ലഭിക്കും. നാലാം ക്ലാസിൽ കുട്ടികളെ ഗാനങ്ങള്‍ ചിട്ടപ്പെടുത്താൻ പരിശീലിപ്പിക്കും. ഒമ്നിടെക്സ്, ജികോംപ്രിസ്, മ്യൂസ്കോര്‍, ഒഡാസിറ്റി എന്നീ സ്വതന്ത്ര സോഫ്‍റ്റ്‍വെയറുകളും കൈറ്റ് തയ്യാറാക്കിയ ‘താളം’ സോഫ്റ്റ്‍വെയറും ഇതിനായി ഉപയോഗിക്കും. എട്ടാം ക്ലാസിലെത്തുന്നതോടെ കുട്ടികളെ അനിമേഷന്‍ സിനിമയ്‌ക്ക്‌ പശ്ചാത്തല സംഗീതം നല്‍കാൻ പ്രാപ്‌തരാക്കും. അപ്പര്‍ പ്രൈമറി തലത്തില്‍ അനിമേഷന്‍ സാങ്കേതികവിദ്യ പ്രാഥമികമായി പരിചയപ്പെടുകയും പത്തിലെത്തുന്നതോടെ അനിമേഷന്‍ ഉള്ളടക്ക നിര്‍മാണത്തിന് അവസരമുണ്ടാവുകയും ചെയ്യുന്ന വിധത്തിലാണ് പാഠപുസ്തകങ്ങള്‍. ആറാം ക്ലാസില്‍ ‘പെന്‍സില്‍ 2ഡി' എന്ന സോഫ്‍റ്റ്‍വെയറിലൂടെ പന്തിന്റേയും കാറിന്റേയും ചലനങ്ങള്‍ തയ്യാറാക്കിക്കൊണ്ടാണ് അനിമേഷന്‍ പഠനം ആരംഭിക്കുന്നത്. പത്താം ക്ലാസിൽ ഓപ്പണ്‍ ടൂണ്‍സ് സോഫ്റ്റ്‍വെയര്‍ ഉപയോഗിച്ച് സ്റ്റോറി ബോര്‍ഡ് തയ്യാറാക്കല്‍, കഥാപാത്രങ്ങളുടെ രൂപകല്പന, കീഫ്രെയിം, ട്വീനിങ്ങ്, ചിത്ര ശ്രേണിയില്‍ ഉപയോഗിച്ചിട്ടുള്ള അനിമേഷന്‍ നിര്‍മാണം തുടങ്ങിയവ കുട്ടികള്‍ പരിചയപ്പെടും. കമ്പ്യൂട്ടര്‍ ഗെയിമും തയ്യാറാക്കും. 9, 10 ക്ലാസുകളില്‍ പൈത്തണ്‍ പ്രോഗ്രാമിങ്ങ് ഭാഷ ഉപയോഗിച്ച് ആഴത്തിലുള്ള പ്രോഗ്രാമിങ്‌ പഠനത്തിനും കുട്ടികള്‍ക്ക് അവസരം ലഭിക്കും.