ഒരു പ്ലാന്റിൽനിന്ന് നിരവധിപേർക്ക് വൈദ്യുതി ; പുനരുപയോഗ ഊർ​ജം , കരട്​ റഗുലേഷൻ തയ്യാർ

തിരുവനന്തപുരം

ഒരു സൗരോർജ്ജ പ്ലാന്റിൽനിന്ന്‌ ഫ്ലാറ്റുകൾ, റസിഡൻഷ്യൽ അസോസിയേഷൻ പരിധിയിലുള്ള നിരവധി ഉപഭോക്താക്കൾക്ക് വൈദ്യുതി ലഭ്യമാക്കുന്ന വെർച്വൽ നെറ്റ് മീറ്ററിങ്, ഗ്രൂപ്പ് നെറ്റ് മീറ്ററിങ്​ എന്നിവ​ നിർദ്ദേശിച്ച്‌ വൈദ്യുതി റഗുലേറ്ററി കമീഷൻ. ‘റിന്യൂവബിൾ എനർജി ആന്റ്‌​ റിലേറ്റഡ് മാറ്റേഴ്‌സ് റഗുലേഷൻസ്- 2025’ കരടിലാണ്‌ ഈ നിർദേശമുള്ളത്‌.

പീക്ക് സമയത്ത് ഗ്രിഡിലേക്ക് നൽകുന്ന വൈദ്യുതിക്ക് ഉയർന്ന വില ലഭിക്കുന്ന രീതിയിലാണ് എനർജി അക്കൗണ്ടിങ്ങും ബില്ലിങ്ങും ക്രമീകരിച്ചിട്ടുള്ളത്. ഉപഭോക്താക്കളുടെ ക്രെഡിറ്റിൽ അധിക വൈദ്യുതിയുള്ളപ്പോഴും വിവിധ ചാർജുകൾ എല്ലാ മാസവും ഈടാക്കുന്ന രീതി ഒഴിവാക്കി സീറോ ബില്ലിങ്ങിന് കരട്​ വ്യവസ്ഥ ചെയ്യുന്നു. പുനരുപയോഗ ഊർജ പദ്ധതികളിലും എനർജി സ്റ്റോറേജ് പദ്ധതികളിലും നിക്ഷേപം ആകർഷിക്കാനും സംരംഭക വികസനത്തിനും സഹായകരമായ വ്യവസ്ഥകളും കരടിലുണ്ട്‌.

വൈദ്യുതി വാഹനത്തിൽ നിന്നു ഗ്രിഡിലേക്ക്​ വൈദ്യുതി നൽകൽ, ഉൽപാദകർ ​ നേരിട്ട് ഇതര ഉപഭോക്താക്കൾക്ക് വൈദ്യുതി വിൽക്കൽ തുടങ്ങിയ നൂതന സംരംഭങ്ങളുമുണ്ട്‌. ഫീസിബിലിറ്റി, രജിസ്ട്രേഷൻ ലഭിക്കാനുള്ള പ്രയാസങ്ങൾ ഒഴിവാക്കാനും അപേക്ഷകർക്ക് ഓൺലൈൻ സംവിധാനം ലഭ്യമാക്കാനും വ്യവസ്ഥയുണ്ട്‌. രജിസ്ട്രേഷൻ ചാർജ്​ നിലവിൽ ഒരു കിലോവാട്ടിന് 1,000 രൂപ എന്നത് 300 രൂപയാക്കി കുറയ്‌ക്കാനാണ്‌ നിർദേശം.

കമീഷൻ തെളിവെടുപ്പ് നത്തുമ്പോൾ ലഭിക്കുന്ന അഭിപ്രായങ്ങളും നിർദ്ദേശങ്ങളും പരിഗണിച്ചാവും അന്തിമ റഗുലേഷൻ. അഭിപ്രായങ്ങൾ 30 ദിവസത്തിനകം ഇ- മെയിൽ ([email protected]) വഴിയോ തപാൽ മുഖേനയോ (സെക്രട്ടറി, കേരള സംസ്ഥാന വൈദ്യുതി റഗുലേറ്ററി കമ്മീഷൻ, വെള്ളയമ്പലം, തിരുവനന്തപുരം 695010) സമർപ്പിക്കാം. പൊതുതെളിവെടുപ്പിന്റെ വിശദാംശങ്ങൾ വെബ്‌സൈറ്റിൽ ലഭ്യമാകും.