സംസ്ഥാനത്ത് ഇന്നും മഴ: മൂന്ന് ജില്ലകളിൽ യെല്ലോ അലർട്ട്

തിരുവനന്തപുരം: കേരളത്തിൽ ഇന്ന് ശക്തമായ മഴയ്ക്ക് സാധ്യത. ഇടുക്കി, മലപ്പുറം, വയനാട് ജില്ലകളിലാണ് യെല്ലോ അലർട്ട് പ്രഖ്യാപിച്ചത്. ഇവിടങ്ങളിൽ ഒറ്റപ്പെട്ട ശക്തമായ മഴയ്ക്കുള്ള സാധ്യതയാണ് പ്രവചിക്കപ്പെട്ടിരിക്കുന്നത്. 24 മണിക്കൂറിൽ 64.5 മില്ലിമീറ്റർ മുതൽ 115.5 മില്ലിമീറ്റർ വരെ മഴ ലഭിക്കുന്ന സാഹചര്യത്തെയാണ് ശക്തമായ മഴ എന്നത് കൊണ്ട് അർത്ഥമാക്കുന്നത്.

ദിത്വ തമിഴ്നാട് തീരത്തോട് അടുക്കുന്നു

ദിത്വ ചുഴലിക്കാറ്റ് കിഴക്കൻ തീരത്തോട് അടുക്കുന്നതിനാൽ തമിഴ്‌നാട്ടിലെയും പുതുച്ചേരിയിലെയും നിരവധി ജില്ലകളിൽ അതിശക്തമായ മഴ പ്രതീക്ഷിക്കുന്നതായി കാലാവസ്ഥാ വകുപ്പ്. ചുഴലിക്കാറ്റ് തീരം തൊടുമെന്ന് പ്രതീക്ഷിക്കുന്നില്ലെന്നും പകരം, അടുത്ത കുറച്ച് മണിക്കൂറുകളിൽ ഇത് ദുർബലമാവുകയും തമിഴ്‌നാട്-പുതച്ചേരി തീരങ്ങൾക്ക് സമാന്തരമായി വടക്കോട്ട് നീങ്ങുകയും ചെയ്യുമെന്നുമാണ് നിരീക്ഷണം. ചുഴലിക്കാറ്റിന്റെ പ്രഭാവത്തില്‍ തമിഴ്നാട്ടിലെ വടക്കൻ ജില്ലകളിൽ കനത്ത മഴ തുടരുകയാണ്.