നാല് മിനിറ്റിൽ 52 തവണ സോറി പറഞ്ഞിട്ടും അയയാതെ പ്രിൻസിപ്പൽ: സ്കൂൾ കെട്ടിടത്തിൽ നിന്നും ചാടി എട്ടാം ക്ലാസുകാരൻ

ഭോപ്പാൽ: സ്‌കൂളിന്‍റെ മൂന്നാം നിലയിൽ നിന്ന് ചാടി ജീവനൊടുക്കാൻ ശ്രമിച്ച എട്ടാം ക്ലാസ്സുകാരന്‍റെ നില ഗുരുതരം. വിദ്യാർഥിയെ സ്വകാര്യ ആശുപത്രിയിൽ പ്രവേശിപ്പിച്ചിരിക്കുകയാണ്. മധ്യപ്രദേശിലെ രത്‌ലാമിലെ ഡോംഗ്രെ നഗറിലെ സ്കൂളിലാണ് സംഭവം. സ്‌കൂൾ അധികൃതർ പറയുന്നത് പ്രകാരം എട്ടാം ക്ലാസുകാരൻ വ്യാഴാഴ്ച മൊബൈൽ ഫോൺ സ്‌കൂളിൽ കൊണ്ടുവന്ന് ക്ലാസ് മുറിയിലെ വീഡിയോ റെക്കോർഡ് ചെയ്‌തു. അത് പിന്നീട് സോഷ്യൽ മീഡിയയിൽ അപ്‌ലോഡും ചെയ്തു. സ്‌കൂൾ നിയമങ്ങൾ ലംഘിച്ചെന്ന് പറഞ്ഞാണ് കുട്ടിയുടെ മാതാപിതാക്കളെ അധികൃതർ വിളിച്ചുവരുത്തിയത്. പിന്നാലെയാണ് വിദ്യാർഥി ആത്മഹത്യയ്ക്ക് ശ്രമിച്ചത്.

പൊലീസ് സ്കൂളിലെ സിസിടിവി ദൃശ്യം പരിശോധിച്ചതിൽ നിന്നും വ്യക്തമായത് കുട്ടി പ്രിൻസിപ്പലിന്‍റ ഓഫീസിൽ പ്രവേശിക്കുകയും ക്ഷമിക്കണമെന്ന് നാല് മിനിറ്റോളം ആവർത്തിച്ച് പറയുകയും ചെയ്തു. ഭയത്തിലും കടുത്ത നിരാശയിലുമായിരുന്നു കുട്ടി. ഏകദേശം 52 തവണ "ക്ഷമിക്കണം" എന്ന് ആവർത്തിച്ചു. എന്നാൽ പ്രിൻസിപ്പൽ ഇത് കേൾക്കാൻ തയ്യാറായില്ല. കുട്ടിയെ സ്കൂളിൽ നിന്നും സസ്‌പെൻഡ് ചെയ്യുമെന്നും ദേശീയ തലത്തിൽ സ്കേറ്റിങ്ങിന് ലഭിച്ച മെഡലുകൾ എടുത്തുകളയുമെന്നും പ്രിൻസിപ്പൽ പറഞ്ഞുവെന്നാണ് റിപ്പോർട്ട്. പിന്നാലെ പ്രിൻസിപ്പലിൻ്റെ ഓഫീസിൽ നിന്ന് പുറത്തേക്ക് ഓടിയ കുട്ടി മൂന്നാം നിലയിൽ നിന്ന് ചാടുകയായിരുന്നു.