രാഹുൽ മാങ്കൂട്ടത്തിലിനെതിരായ കേസ്: പാലക്കാട് ഫ്ലാറ്റിൽ പരിശോധന

പാലക്കാട്: യുവതിയെ ലൈം​ഗികചൂഷണം നടത്തിയ കേസിൽ രാഹുൽ മാങ്കൂട്ടത്തിൽ എംഎൽഎയുടെ പാലക്കാടുള്ള ഫ്ലാറ്റിൽ പരിശോധന നടക്കുന്നു. തിരുവനന്തപുരത്ത് നിന്നുള്ള അന്വേഷണ സംഘം ഇന്ന് പാലക്കാട് ക്രൈംബ്രാഞ്ച് ഓഫീസിൽ എത്തിയിരുന്നു. ഇരു ടീമുകളും സംയുക്തമായാണ് ഫ്ലാറ്റിൽ പരിശോധന നടത്തുന്നത്. കുന്നത്തൂർമേടുള്ള ഫ്ലാറ്റിലാണ് പ്രത്യേക അന്വേഷണ സംഘം പരിശോധന നടത്തുന്നത്.

കേസിൽ രാഹുൽ മാങ്കൂട്ടത്തിലിനെ വേ​ഗത്തിൽ അറസ്റ്റ് ചെയ്യാനാണ് നീക്കം. നിലവിൽ രാഹുൽ ഒളിവിലാണ്. രാഹുലിനായി സംസ്ഥാന വ്യാപകമായി പൊലീസ് അന്വേഷണം നടത്തുന്നുണ്ട്. രാഹുലിന്റെ ബന്ധുക്കളും സുഹൃത്തുക്കളും നിരീക്ഷണത്തിലാണ്. ബന്ധുക്കളിൽ ചിലരെ ചോദ്യം ചെയ്തേക്കും. അതേസമയം, രാഹുൽ കോയമ്പത്തൂരിൽ ഒളിച്ചുകഴിയുന്നതായാണ് സൂചന. തമിഴ്നാട് കേന്ദ്രീകരിച്ചും പൊലീസ് അന്വേഷണം നടക്കുന്നുണ്ട്. എഡിജിപി എച്ച് വെങ്കിടേഷിന്റെ നേതൃത്വത്തിൽ യോ​ഗം ചേർന്നു.

​ഗർഭഛിദ്രത്തിനിരയായതായ യുവതിയുടെ മൊഴി ആശുപത്രി അധികൃതർ സ്ഥിരീകരിച്ചിട്ടുണ്ട്. ഗുരുതര രക്തസ്രാവത്തിന് സ്വകാര്യ ആശുപത്രിയിൽ യുവതി ചികിത്സ തേടിയിരുന്നുവെന്ന് കണ്ടെത്തി. ​ഗർഭാവസ്ഥയിലിരിക്കുമ്പോൾ ഏഴ് ആഴ്ച വരെ കഴിക്കാവുന്ന മരുന്നുകളാണ് യുവതിയെക്കൊണ്ട് നിർബന്ധിച്ച് കഴിപ്പിച്ചത്. ഈ മരുന്നുകൾ ജീവൻ നഷ്ടപ്പെടുത്താൻ വരെ സാധ്യതയുള്ള മരുന്നുകളായിരുന്നുവെന്ന് ഡോക്ടർമാർ പറയുന്നു.

കേസിൽ യുവതി നൽകിയ ശബ്ദരേഖ തെളിവുകലുടെ ആധികാരിക അന്വേഷണ സംഘം പരിശോധിക്കും. ഇതിനായി ഇരുവരുടേയും ശബ്ദ സാമ്പിളുകൾ ശേഖരിക്കും. ഗ‍​ർ‌ഭഛിദ്രത്തിന് ഇരയായ യുവതി തനിക്കുണ്ടായ ശാരീരികവും മാനസികവുമായ ദുരനുഭവങ്ങൾ പങ്കുവെയ്ക്കുന്നതിൻ്റെ ശബ്ദരേഖ കഴിഞ്ഞ ദിവസം പുറത്തുവന്നിരുന്നു. ​ഗർഭഛിദ്രത്തിന് മരുന്ന് ഉപയോഗിച്ചതിന് ഡോക്ടർ വഴക്ക് പറഞ്ഞതായി ശബ്ദ സന്ദേശത്തിൽ യുവതി വെളിപ്പെടുത്തി. ഗർഭഛിദ്രത്തിനുള്ള ​ഗുളിക മാങ്കൂട്ടത്തിലിന്റെ നിർദേശം അനുസരിച്ച് സുഹൃത്തും യൂത്ത് കോൺ​ഗ്രസ് നേതാവുമായ ജോബി ജോസഫാണ് ​എത്തിച്ചുനൽകിയതെന്ന് പെൺകുട്ടി മൊഴിനൽകിയിട്ടുണ്ട്.