'ഇവന്റെ സകല ചരിത്രവും എനിക്കറിയാം, ഒരുപാട് കേസുകളുണ്ട്, പറയിപ്പിക്കരുത്'; വീണ്ടും രാജ്‌മോഹൻ ഉണ്ണിത്താൻ

തിരുവനന്തപുരം: മാങ്കൂട്ടത്തിലിന്റെ സകല ചരിത്രവും അറിയാമെന്നും അതുകൊണ്ട് ഇനി സൈബര്‍ ആക്രമണം തുടര്‍ന്നാല്‍ പലതും പരസ്യമായി വിളിച്ച് പറയേണ്ടിവരുമെന്നും രാജ്‌മോഹൻ ഉണ്ണിത്താൻ എംപി. ആ പറയുന്നത് അവന്റെ അന്ത്യംകുറിക്കും' എന്നുമുള്ള താക്കീത് ഉണ്ണിത്താൻ നൽകി.

'മാങ്കൂട്ടത്തിലിനായി കോണ്‍ഗ്രസിന്റെ പ്രതിച്ഛായ കളങ്കപ്പെടുത്തി. കോൺഗ്രസ് മുഖപത്രമായ വീക്ഷണത്തിൽ മാങ്കൂട്ടത്തിലിനെ ന്യായീകരിച്ചുള്ള എഡിറ്റോറിയൽ കേരളത്തിലെ പൊതുസമൂഹം പരമപുച്ഛത്തോടെ തളളിക്കളയും. കോണ്‍ഗ്രസില്‍ വ്യക്തിത്വമുളളവരെ സൈബര്‍ ആക്രമണത്തിലൂടെ കീഴ്‌പ്പെടുത്തി അവരുടെ വായടപ്പിക്കാനാണ് ശ്രമമെങ്കില്‍ കൂടുതല്‍ കാര്യങ്ങള്‍ ഞാന്‍ പറയും. എന്നെക്കൊണ്ട് പറയിപ്പിക്കരുത്. അനാവശ്യമായി പ്രകോപിപ്പിക്കരുത്. ഒരുപാട് കേസുകളുണ്ട്. ആ കേസുകളെക്കുറിച്ച് എല്ലാമറിയാവുന്ന ആളാണ് ഞാന്‍. സൈബര്‍ ആക്രമണം തുടര്‍ന്നാല്‍ വാര്‍ത്താസമ്മേളനം നടത്തി ഞാന്‍ എല്ലാം പറയും': രാജ്‌മോഹന്‍ ഉണ്ണിത്താന്‍ പറഞ്ഞു.

കേരളത്തിലെ മുഴുവൻ കോൺ​ഗ്രസ് നേതാക്കളേക്കാൾ ജനകീയ സ്വാധീനം തനിക്കാണെന്ന് വരുത്തിത്തീർക്കാൻ മാങ്കൂട്ടത്തിൽ ഹീനമായ മാർ​ഗങ്ങളുപയോ​ഗിച്ച് പിആർ വർക് നടത്തിയെന്ന് ഉണ്ണിത്താൻ കഴിഞ്ഞ ദിവസം പറഞ്ഞിരുന്നു. അതിന്റെ ഫലമാണ് ഇപ്പോൾ കിട്ടിയത്. വിഷയത്തിൽ മാങ്കൂട്ടത്തിലിനെതിരെ ഉചിതമായ തീരുമാനം ഉചിതമായ സമയത്ത് കോൺ​ഗ്രസ് എടുത്തു. ആ തീരുമാനം ശരിയായിരുന്നു. അയാൾ ഒറ്റയൊരുത്തനാണ് ആ തീരുമാനം ലംഘിച്ചതെന്നും ഉണ്ണിത്താൻ മുൻപ് വ്യക്തമാക്കിയതാണ്.

അതേസമയം, കലാപം സൃഷ്ടിച്ച്‌ പദവികളിലെത്തിയത്‌ ക്രിമിനൽ സംഘമാണെന്നും അതിന്റെ ദുരന്തമാണ്‌ പാർട്ടി അനുഭവിക്കുന്നതെന്നുമുള്ള ചർച്ച കോൺഗ്രസിൽ സജീവമാണ്. മുതിർന്നവർ സ്ഥാനങ്ങളിൽ കടിച്ചുതൂങ്ങുന്നതിനെതിരെ കോലാഹലം സൃഷ്ടിച്ച്‌ പദവിയിലെത്തിയവർ അർഹരെ അവഗണിച്ച്‌, സ്വന്തം ‘ ടീം ’ ഉണ്ടാക്കി. ഇത്‌ നിയന്ത്രിക്കാൻ പ്രതിപക്ഷ നേതാവിനോ കെപിസിസിക്കോ കഴിഞ്ഞില്ലെന്നുമാണ്‌ വിമർശം.