കടം കുറയുന്നതിൽ കേരളം മുന്നിൽ : കെ എൻ ബാലഗോപാൽ

തിരുവനന്തപുരം

രാജ്യത്ത്‌ കടം കുറയുന്ന സംസ്ഥാനങ്ങളിൽ കേരളം മുന്നിലാണെന്ന്‌ ധനമന്ത്രി കെ എൻ ബാലഗോപാൽ പറഞ്ഞു. കെഎസ്​എഫ്​ഇ ഒരു ലക്ഷം കോടി രൂപയുടെ ബിസിനസ്‌ നേട്ടം കൈവരിച്ചതിന്റെ പ്രഖ്യാപനച്ചടങ്ങിൽ സംസാരിക്കുകയായിരുന്നു മന്ത്രി.

കേന്ദ്ര ധനമന്ത്രിയാണ്‌ ഇക്കാര്യം പാർലമെന്റിൽ വ്യക്​തമാക്കിയതെന്ന്‌ ബാലഗോപാൽ ചൂണ്ടിക്കാട്ടി. കേരളത്തിൽ സർവത്ര കടമെന്ന പ്രചാരണം​ ഇതോടെ പൊളിഞ്ഞു​. നിശ്ചയിച്ച പരിധിയിൽനിന്നേ കടമെടുക്കാനാകൂ എന്നതാണ്‌ വസ്തുത. അതെല്ലാം മറച്ചുവച്ചായിരുന്നു പ്രചാരണം.

2020–-21ൽ ജിഎസ്​ഡിപിയുടെ 40 ശതമാനമായിരുന്ന കടം ഇപ്പോൾ 35 ശതമാനമായി താഴ്​ന്നു. അഞ്ച്​ ശതമാനം കുറവെന്നത്​ 70,000 കോടി രൂപയോളം വരും. ഒന്നാം പിണറായി സർക്കാരിന്റെ കാലത്ത്​ വർഷം 1.15 ലക്ഷം കോടി രൂപയാണ് ശരാശരി ചെലവഴിച്ചത്​. അർഹമായ ​കടമെടുപ്പിൽ വർഷം 50,000 കോടി രൂപ വെട്ടിക്കുറവുണ്ടായിട്ടും ഇ‍ൗ സർക്കാർ വർഷം ശരാശരി 1.65 ലക്ഷം കോടി രൂപയാണ്‌ ചെലവഴിച്ചത്‌​. വരുംവർഷം രണ്ട്​ ലക്ഷം കോടിയായി വാർഷിക ബജറ്റ്​ മാറുമെന്നും അദ്ദേഹം പറഞ്ഞു.