പക്ഷിയിടിച്ചു; എയർ ഇന്ത്യ വിമാനം തിരിച്ചിറക്കി

മട്ടന്നൂർ: കണ്ണൂർ അന്താരാഷ്​ട്ര വിമാനത്താവളത്തിൽനിന്ന്​ പറന്നുയരുന്നതിനിടെ പക്ഷിയിടിച്ചതിനെത്തുടർന്ന്​ കണ്ണൂർ–അബുദാബി എയർ ഇന്ത്യ എക്സ്​പ്രസ്​ വിമാനം അടിയന്തരമായി തിരിച്ചിറക്കി. ഞായർ രാവിലെ 6.30നായിരുന്നു സംഭവം. പഷാർജയിൽനിന്ന്​ എത്തിയ എയർ ഇന്ത്യയുടെ മറ്റൊരു വിമാനത്തിൽ യാത്രക്കാർ പകൽ മൂന്നരയോടെ അബുദാബിയിലേക്ക്​ തിരിച്ചു.

പക്ഷിയിടിച്ച വിമാനം വിമാനത്താവളത്തിലെ ബേയിലേക്ക്​ മാറ്റി സാ​ങ്കേതിക പരിശോധന നടത്തി. കേടുപാടൊന്നും സംഭവിച്ചിട്ടില്ലെന്ന് അധികൃതർ അറിയിച്ചു. 180 യാത്രക്കാരാണ് വിമാനത്തിൽ ഉണ്ടായിരുന്നത്. 24 മണിക്കൂറിനുശേഷമേ ഈ വിമാനം സർവീസ്​ നടത്തുകയുള്ളൂ. ഇവിടെ നേരത്തേയും പക്ഷികൾ വിമാനങ്ങൾക്ക്​ പ്രശ്​നം സൃഷ്ടിക്കാറുണ്ടായിരുന്നു. പടക്കം പൊട്ടിച്ചും മറ്റുമാണ്​ പക്ഷികളെ ഓടിച്ചിരുന്നത്​. മറ്റു വിമാനത്താവളങ്ങളെ അപേക്ഷിച്ച്​ കണ്ണൂരിൽ പക്ഷിശല്യം കുറവാണെന്നും അധികൃതർ പറഞ്ഞു.