Deshabhimani

കോമൺവെൽത്ത് ഗെയിംസിൽ ഇന്ത്യ നാലാം സ്ഥാനത്ത്; ചരിത്ര നേട്ടവുമായി അത്‌ലറ്റുകളും ബോക്സിങ് താരങ്ങളും

commonwealth games 2030
വെബ് ഡെസ്ക്

Published on Aug 02, 2026, 04:46 PM | 3 min read

ഗ്ലാസ്ഗോ : കോമൺവെൽത്ത് ഗെയിംസില്‍ ബോക്സിങ് താരങ്ങളുടെ കരുത്തിൽ 10 മെഡലുകൾ കൂടി കൂട്ടിച്ചേർത്ത് ഇന്ത്യ നാലാം സ്ഥാനത്തേക്ക് ഉയർന്നു. ഗുസ്തി, ബാഡ്മിന്റൺ, ഹോക്കി തുടങ്ങിയ ഇനങ്ങൾ ഒഴിവാക്കപ്പെട്ടിട്ടും 13 സ്വർണ്ണവും 17 വെള്ളിയും 9 വെങ്കലവുമടക്കം മികച്ച പ്രകടനമാണ് ഇന്ത്യ കാഴ്ചവെച്ചത്. പാരാ പവർലിഫ്റ്റിംഗിൽ ഝാണ്ടു കുമാർ വെങ്കലം നേടി ഇന്ത്യയുടെ ആദ്യ മെഡൽ നേടിയപ്പോൾ, വനിതകളുടെ 48 കിലോഗ്രാം വെയ്റ്റ്‌ലിഫ്റ്റിംഗിൽ ഒന്നാമതെത്തി സാഖോം മീരാബായ് ചാനുവാണ് ഇന്ത്യയുടെ സ്വർണ നേട്ടത്തിന് തുടക്കം കുറിച്ചത്.


ഗെയിംസിൽ നിരവധി ആദ്യകാല ചരിത്രങ്ങൾ ഇന്ത്യ കുറിച്ചു. ഡെക്കാത്ത്‌ലണിൽ വെങ്കലം നേടി തേജസ്വിൻ ശങ്കർ ഈ ഇനത്തിൽ മെഡൽ നേടുന്ന ആദ്യ ഇന്ത്യക്കാരനായി. 10,000 മീറ്ററിൽ വെള്ളിയും 5,000 മീറ്ററിൽ വെങ്കലവും നേടി ഗുൽവീർ സിങ് ഒറ്റ കോമൺവെൽത്ത് ഗെയിംസിൽ അത്‌ലറ്റിക്‌സിൽ രണ്ട് മെഡലുകൾ നേടുന്ന ആദ്യ ഇന്ത്യൻ താരമായി.


വനിതകളുടെ ഷോട്ട്പുട്ടിൽ ഷർമിള ധങ്കർ പാരാ-അത്‌ലറ്റിക്‌സിൽ ഇന്ത്യയുടെ ആദ്യ സ്വർണം നേടി. പുരുഷന്മാരുടെ 100 മീറ്റർ ടി 47 ഓട്ടത്തിൽ ദിലീപ് ഗാവിത്, ജൂഡോയിൽ അസ്മിത ഡേ (48 കിലോ), ഹർഷ് സിംഗ് (60 കിലോ), പാരാ-ഷോട്ട്പുട്ടിൽ സോമൻ റാണ എന്നിവർ ഇന്ത്യക്കായി സ്വർണം നേടി. ബോക്സിങിൽ പ്രീതി പവാർ, ജെയ്‌സ്‌മിൻ ലംബോറിയ, സാക്ഷി ചൗധരി, പ്രിയ ഘംഗാസ്, അരുന്ധതി ചൗധരി, സച്ചിൻ സിവാച്ച്, അങ്കുഷ് പങ്കാൽ എന്നിവരും സ്വർണമണിഞ്ഞു.


വെള്ളി മെഡൽ ജേതാക്കളിൽ ഒളിമ്പിക് താരം നീരജ് ചോപ്ര (ജാവലിൻ ത്രോ - 85.83 മീറ്റർ), ലോങ് ജമ്പിൽ മുരളി ശ്രീശങ്കർ, ട്രിപ്പിൾ ജമ്പിൽ പ്രവീൺ ചിത്രവേൽ, ഹൈജമ്പിൽ സർവേഷ് അനിൽ കുഷാരെ, ഓട്ടത്തിൽ ഗുൽവീർ സിംഗ് എന്നിവർ തിളങ്ങി. വെയ്റ്റ്‌ലിഫ്റ്റിംഗിൽ ഋഷികാന്ത സിംഗ് (60 കിലോ), മുത്തുപാണ്ടി രാജ (65 കിലോ), ഗ്യാനേശ്വരി യാദവ് (53 കിലോ), വല്ലൂരി അജയ് ബാബു (79 കിലോ), ഹർജീന്ദർ കൗർ (69 കിലോ), ലവ്പ്രീത് സിംഗ് (+110 കിലോ) എന്നിവരും വെള്ളി നേടി. ബോക്സിങിൽ ലവ്‌ലിന ബോർഗോഹെയ്ൻ, നരേന്ദർ ബെർവാൾ, ജാദുമണി സിങ് എന്നിവരും ജൂഡോയിൽ യാമിനി മൗര്യയും പാരാ-അത്‌ലറ്റിക്‌സിൽ മുഹമ്മദ് ബാസിലും ശുഭം ജൂയാലും വെള്ളി കരസ്ഥമാക്കി.


വെങ്കല മെഡലുകളിൽ ജാവലിൻ ത്രോയിൽ യഷ്‌വീർ സിങും, ട്രിപ്പിൾ ജമ്പിൽ സെൽവ പ്രഭു തിരുമാരനും, 5000 മീറ്ററിൽ ഗുൽവീർ സിങും, ഡെക്കാത്ത്‌ലണിൽ തേജസ്വിൻ ശങ്കറും, ഡിസ്‌കസ് ത്രോയിൽ സീമ കലിരാംനയും നേട്ടമുണ്ടാക്കി. വെയ്റ്റ്‌ലിഫ്റ്റിംഗിൽ ബിന്ധ്യാറാണി ദേവി (58 കിലോ), പാരാ പവർലിഫ്റ്റിംഗിൽ ഝാണ്ടു കുമാർ, പാരാ-ഷോട്ട്പുട്ടിൽ ശിൽപ ഷൈല, ജൂഡോയിൽ ഉന്നതി ശർമ്മ എന്നിവരും വെങ്കലം നേടി.


മെഡൽ പട്ടികയിൽ 70 സ്വർണം, 45 വെള്ളി, 56 വെങ്കലം ഉൾപ്പെടെ 171 മെഡലുകളുമായി ഓസ്‌ട്രേലിയ ഒന്നാം സ്ഥാനത്ത് എത്തി . 29 സ്വർണം, 45 വെള്ളി, 36 വെങ്കലം ഉൾപ്പെടെ 110 മെഡലുകളുമായി ഇംഗ്ലണ്ട് രണ്ടാം സ്ഥാനത്തും, 19 സ്വർണം, 20 വെള്ളി, 23 വെങ്കലം ഉൾപ്പെടെ 62 മെഡലുകളുമായി കാനഡ മൂന്നാം സ്ഥാനത്തുമാണ്.


13 സ്വർണം, 17 വെള്ളി, 9 വെങ്കലം ഉൾപ്പെടെ 39 മെഡലുകളുമായി ഇന്ത്യ നാലാം സ്ഥാനത്താണ്. ആതിഥേയരായ സ്കോട്‌ലൻഡ് 13 സ്വർണം, 8 വെള്ളി, 17 വെങ്കലം ഉൾപ്പെടെ 39 മെഡലുകളുമായി ഇന്ത്യയ്ക്ക് തൊട്ടുപിന്നിൽ അഞ്ചാം സ്ഥാനത്തുണ്ട്. നൈജീരിയ 24 മെഡലുകളുമായി ആറാം സ്ഥാനത്തും, ജമൈക്ക 18 മെഡലുകളുമായി ഏഴാം സ്ഥാനത്തുമാണ്. ആദ്യ പത്തിൽ ന്യൂസിലൻഡ് (36 മെഡൽ), വെയിൽസ് (31 മെഡൽ), മലേഷ്യ (16 മെഡൽ) എന്നിവരും ഇടംപിടിച്ചിട്ടുണ്ട്.


ഇതോടൊപ്പം ഇന്ത്യയുടെ മുൻകാല കോമൺവെൽത്ത് നേട്ടങ്ങളെക്കുറിച്ച് പരിശോധിച്ചാൽ. 2018ലെ ഗോൾഡ് കോസ്റ്റ് ഗെയിംസ് ഇന്ത്യയുടെ മൂന്നാമത്തെ ഏറ്റവും മികച്ച കോമൺവെൽത്ത് ഗെയിംസായിരുന്നു. അന്ന് 26 സ്വർണവും 20 വെള്ളിയും 20 വെങ്കലവുമടക്കം 66 മെഡലുകളോടെ ഓസ്‌ട്രേലിയക്കും ഇംഗ്ലണ്ടിനും പിന്നിൽ ഇന്ത്യ മൂന്നാം സ്ഥാനത്ത് എത്തിയിരുന്നു. 2010 ൽ ഡൽഹിയിൽ 101 മെഡലുകളും 2002 മെൽബണിൽ 69 മെഡലുകളുമാണ് ഇന്ത്യ നേടിയത്.


2018ൽ ഇന്ത്യയുടെ ആദ്യ മെഡൽ വെയ്റ്റ്‌ലിഫ്റ്റിംഗിൽ പി ഗുരുരാജയാണ് (വെള്ളി) സ്വന്തമാക്കിയത്. അവസാന മെഡൽ ബാഡ്മിന്റൺ പുരുഷ ഡബിൾസിൽ സാത്വിക് സായ്രാജ്-ചിരാഗ് ഷെട്ടി സഖ്യം നേടി. അന്ന് ഷൂട്ടിങിൽ 16 മെഡലുകളും റെസ്ലിംഗിൽ 12 മെഡലുകളും വെയ്റ്റ്‌ലിഫ്റ്റിംഗിലും ബോക്‌സിംഗിലും 9 വീതം മെഡലുകളും ലഭിച്ചു. ടേബിൾ ടെന്നീസിൽ മാണിക ബാത്രയുടെ ചരിത്രപരമായ നേട്ടമടക്കം 8 മെഡലുകളും ബാഡ്മിന്റണിൽ സൈന നെഹ്‌വാളിന്റെ സ്വർണമടക്കം 6 മെഡലുകളും ഇന്ത്യ സ്വന്തമാക്കിയിരുന്നു.



deshabhimani section

Related News

View More
0 comments
Sort by

deshabhimani section

Dont Miss it

deshabhimani section

Recommended

Deshabhimani
Home