കൊമ്പനെ മെരുക്കാൻ മലപ്പുറം എഫ്‌സി

സ്വന്തം ലേഖകന്‍

മലപ്പുറം

സൂപ്പർ ലീഗ് കേരളയില്‍ മലപ്പുറം എഫ്സിക്ക് ഞായറാഴ്ച നിര്‍ണായകം. തിരുവനന്തപുരം കൊമ്പന്‍സിനെതിരെയുള്ള മത്സരത്തില്‍ വിജയിച്ചാല്‍ സെമി ഫൈനല്‍ യോഗ്യത ഉറപ്പിക്കാം. എട്ടുകളിയില്‍ രണ്ട് വിജയംമാത്രമുള്ള മലപ്പുറം 10 പോയിന്റോടെ നാലാംസ്ഥാനത്താണ്. നാല് സമനിലയും രണ്ട് തോല്‍വിയുമുണ്ട്. എട്ട് കളിയില്‍ മൂന്ന് ജയമുള്ള തിരുവനന്തപുരം 11 പോയിന്റോടെ മൂന്നാംസ്ഥാനത്താണ്. തിരുവനന്തപുരത്തിന്റെ തട്ടകമായ ചന്ദ്രശേഖരന്‍ നായര്‍ സ്റ്റേഡിയത്തില്‍ രാത്രി 7.30നാണ് മത്സരം. ആദ്യറൗണ്ടില്‍ ഇരു ടീമുകളും ഏറ്റുമുട്ടിയപ്പോള്‍ ഒരുഗോളിന്റെ സമനിലയായിരുന്നു. സീസണില്‍ ഹോം ഗ്രൗണ്ടിനുപുറത്ത് മലപ്പുറം അഞ്ചാമത്തെ കളിക്കാണിറങ്ങുന്നത്. ജില്ലയ്ക്കുപുറത്ത് കളിച്ച നാല് മത്സരങ്ങളില്‍ ഒന്നില്‍മാത്രമാണ് ജയം. രണ്ട് തോല്‍വിയും ഒരുസമനിലയുമുണ്ട്. അവസാന മൂന്ന് കളികളില്‍ വിജയമില്ല. മറുവശത്ത് അവസാനത്തെ മൂന്ന് കളിയും വിജയിച്ച ആത്മവിശ്വാസമുണ്ടെങ്കിലും സ്വന്തം തട്ടകത്തിലെ നാല് കളിയില്‍ മൂന്നിലും തോറ്റ ചരിത്രമാണ് തിരുവനന്തപുരത്തിന്. ഞായറാഴ്ച മലപ്പുറം ജയിച്ചാല്‍ 13 പോയിന്റോടെ മൂന്നാംസ്ഥാനത്താകും. തിരുവനന്തപുരം നാലിലേക്ക് താഴും. അഞ്ചാംസ്ഥാനത്തുള്ള കണ്ണൂരിനും 10 പോയിന്റാണ്. ഡിസംബര്‍ രണ്ടിന് തൃശൂരിനെതിരെ കണ്ണൂര്‍ ജയിച്ചാലും ഗോള്‍വ്യത്യാസത്തിന്റെ ബലത്തില്‍ മലപ്പുറം സുരക്ഷിതമാകും. ഡിസംബര്‍ മൂന്നിന് കലിക്കറ്റിനെതിരെ തിരുവനന്തപുരം ജയിച്ചാലും മലപ്പുറത്തിന് നാലാംസ്ഥാനത്തോടെ സെമി ഉറപ്പിക്കാം. ഡിസംബര്‍ നാലിന് കൊച്ചിക്കെതിരെയാണ് മലപ്പുറത്തിന്റെ അവസാന മത്സരം. ഇത് മഞ്ചേരി പയ്യനാട് സ്റ്റേഡിയത്തിലാണ്. ഞായറാഴ്ച മലപ്പുറം സമനില വഴങ്ങുകയോ തോല്‍ക്കുകയോചെയ്താല്‍ സെമിപ്രവേശം കഠിനമാകും. അവസാന കളിയില്‍ വിജയിക്കുകയും മറ്റ് മത്സരഫലം അനുകൂലമാവുകയുംചെയ്താല്‍മാത്രമേ സെമിയിലേക്ക് കടക്കാന്‍ കഴിയൂ.