വികസനം വോട്ടാകും

സ്വന്തം ലേഖകൻ

മലപ്പുറം

കേരളത്തിലെ ജനങ്ങളെ സംബന്ധിച്ച് സമാധാനപരമായ ഒമ്പതര വർഷമാണ്‌ കടന്നുപോയത്‌. അത്‌ ജനങ്ങൾക്ക്‌ അനുഭവവേദ്യമായ ഒന്നാണ്. വർഗീയ കലാപങ്ങളും സംഘർഷങ്ങളും നിലനിൽക്കുന്ന രാജ്യത്ത്‌ സമാധാനപരമായി ജീവിക്കാൻ സാധിക്കുന്ന പശ്ചാത്തലം ഒരുക്കാൻ എൽഡിഎഫ്‌ സർക്കാരിന്‌ സാധിച്ചു. വികസന പ്രക്രിയകളിൽ വലിയ മുന്നേറ്റമുണ്ടായി. ഇന്ത്യക്ക് മാത്രമല്ല, ലോകത്തിന് തന്നെ അടയാളപ്പെടുത്താൻ സാധിക്കുന്ന രീതിയിൽ അതിദാരിദ്ര്യമുക്തമാകാൻ സാധിച്ചു. അടുത്ത അഞ്ചുവർഷംകൊണ്ട്‌ ദാരിദ്ര്യം പൂർണമായി അവസാനിപ്പിക്കാൻ ലക്ഷ്യമിട്ടാണ്‌ സർക്കാർ മുന്നോട്ട്‌ പോകുന്നത്‌. പെൻഷൻ 2000 രൂപയായി വർധിപ്പിച്ചു. സ്ത്രീ സുരക്ഷാ പദ്ധതിയുടെ ഭാഗമായി 1000 രൂപ പെൻഷനും തൊഴിലന്വേഷകരായ യുവജനങ്ങൾക്ക്‌ 1000 രൂപയും നൽകാൻ തീരുമാനിച്ചു. കിഫ്‌ബിവഴി പശ്ചാത്തല സൗകര്യ വികസനമേഖലയിൽ വലിയ മുന്നേറ്റമുണ്ടായി. നിക്ഷേപ സൗഹൃദ സംസ്ഥാനമായി കേരളം മാറി. ദേശീയപാത ആറുവരിപ്പാത പൂർത്തിയാക്കി. ദേശീയപാതക്ക്‌ ഭൂമി ഏറ്റെടുക്കാൻ 560 കോടി രൂപയാണ്‌ സംസ്ഥാനം ചെലവഴിച്ചത്‌. മറ്റൊരു സംസ്ഥാനത്തിനും ഇ‍ൗ അവസ്ഥയുണ്ടായിട്ടില്ല. മലയോര ഹൈവേ, തീരദേശ ഹൈവേ ഉൾപ്പെടെയുള്ള ഗതാഗത സംവിധാനങ്ങൾ ലോകോത്തര രീതിയിൽ മാറി. കേരളം ഒരു വിജ്ഞാന സമൂഹമായി വളർന്നു. സ്റ്റാർട്ടപ്പ് മിഷൻവഴി സംരംഭകരെ വളർത്തി. കൊച്ചിയിൽ നടത്തിയ നിക്ഷേപക സംഗമത്തിൽ രണ്ട്‌ ലക്ഷം കോടി രൂപയുടെ നിക്ഷേപ വാഗ്‌ദാനമുണ്ടായി. ഭാവി കേരളത്തിന്റെ തൊഴിലില്ലായ്മ പ്രശ്നം ഉൾപ്പെടെ പരിഹരിക്കാൻ ഇതുവഴി സാധിക്കും. രാജ്യത്ത്‌ പിഎസ്‌സിവഴി തൊഴിൽ നൽകുന്നതിന്റെ 80 ശതമാനവും കേരളത്തിലാണ്‌. കേരളത്തെ അർധ വികസിത രാജ്യങ്ങളുടെ ജീവിത നിലവാരത്തോടൊപ്പം എത്തിക്കാനുള്ള ഫലപ്രദ പ്രവർത്തനമാണ് ഇടതുപക്ഷ ജനാധിപത്യ മുന്നണി ലക്ഷ്യമിടുന്നത്. മൂന്നാം ഇടതുപക്ഷ സർക്കാരിന്റെ വിളംബരമായി തെരഞ്ഞെടുപ്പ്‌ ഫലം മാറും.