മരുന്നുഷോപ്പുകൾ കേന്ദ്രീകരിച്ച്‌ 
ബോധവൽക്കരണം

മലപ്പുറം

ആന്റിബയോട്ടിക് മരുന്നുകളുടെ അശാസ്ത്രീയമായ ഉപയോഗം തടയുന്നതിന് മരുന്നുഷോപ്പുകൾ കേന്ദ്രീകരിച്ചുള്ള ബോധവൽക്കരണം തുടങ്ങി. സംസ്ഥാന ആരോഗ്യ- കുടുംബക്ഷേമ വകുപ്പിന്റെ ആഭിമുഖ്യത്തില്‍ കേരളത്തെ സമ്പൂര്‍ണ ആന്റിബയോട്ടിക് സാക്ഷര സംസ്ഥാനമാക്കുന്ന പദ്ധതിയുടെ ഭാഗമായാണ് ബോധവൽക്കരണം. ആന്റിബയോട്ടിക്കുകളുടെ അമിതവും അനിയന്ത്രിതവുമായ ഉപയോഗം തടയുക, ആന്റിബയോട്ടിക്കുകളുടെ കോഴ്സ് പൂര്‍ത്തിയാക്കാതിരിക്കുക, ഡോക്ടര്‍മാരുടെ കുറിപ്പടിയില്ലാതെ ആന്റിബയോട്ടിക്കുകളുടെ സ്വയം ഉപയോഗം, മൃഗങ്ങള്‍ക്കുള്ള ആന്റിബയോട്ടിക്കുകളുടെ അമിത ഉപയോഗം, ആന്റിബയോട്ടിക്കുകള്‍ അലക്ഷ്യമായി വലിച്ചെറിയുക എന്നിവയെ കുറിച്ചാണ് ബോധവൽക്കരണം. ഡെപ്യൂട്ടി ജില്ലാ മെഡിക്കല്‍ ഓഫീസര്‍ എ ഷിബുലാല്‍, ജൂനിയര്‍ അഡ്മിനിസ്ട്രേറ്റീവ് മെഡിക്കല്‍ ഓഫീസര്‍ മാത്യു ജെ വാളംപറമ്പില്‍, ജില്ലാ എഡ്യുക്കേഷന്‍ മീഡിയ ഓഫീസര്‍ കെ പി സാദിഖ് അലി, ഡെപ്യൂട്ടി ജില്ലാ എഡ്യുക്കേഷന്‍ മീഡിയ ഓഫീസര്‍ ഡി എസ് വിജയകുമാര്‍ എന്നിവർ നേതൃത്വം നൽകി.