യൂത്ത് കോൺഗ്രസ് നേതാവ്‌ പ്രവാസിയുടെ 62.72 ലക്ഷം തട്ടി

സ്വന്തം ലേഖകൻ

ചെങ്ങന്നൂര്‍

ഭൂമി തരംമാറ്റി നൽകാമെന്ന്‌ വിശ്വസിപ്പിച്ച്‌ യൂത്ത് കോൺഗ്രസ് ചെങ്ങന്നൂർ മണ്ഡലം പ്രസിഡന്റ്‌ സുബിൻ മാത്യു പ്രവാസിയില്‍നിന്ന്‌ 62,72,415 രൂപ തട്ടിയെടുത്തെന്ന്‌ പരാതി. ചെങ്ങന്നൂര്‍ പുത്തന്‍കാവ് ഇടവത്ര പീടികയില്‍ ഫിലിപ്പ് മാത്യു നൽകിയ പരാതിയിൽ പുത്തൻകാവ് ഐരൂക്കുഴിയിൽ പള്ളത്ത് സുബിന്‍ മാത്യു, സഹായികളായ ഐഎൻടിയുസി പ്രവർത്തകൻ തിട്ടമേൽ അനീഷ് ഭവനത്തിൽ ചന്ദ്രന്‍, സാംസണ്‍ എന്നിവർക്കെതിരെ പൊലീസ്‌ കേസെടുത്തു. ​ ഫിലിപ്പ് മാത്യുവിന്റെ ഭാര്യ മറിയാമ്മ ജോർജിന്റെ പേരില്‍ തിരുവനന്തപുരം കുറവൻകോണത്തുള്ള ഭൂമി തരംമാറ്റി കൊടുക്കാമെന്ന് വിശ്വസിപ്പിച്ചാണ്‌ തട്ടിപ്പ്‌. ഫിലിപ്പ് മാത്യുവിന്റെ ഫെഡറല്‍ബാങ്ക്‌ ആറാട്ടുപുഴ ബ്രാഞ്ചിലെ അക്കൗണ്ടില്‍നിന്ന്‌ ചെക്ക്‌ മുഖേനയും നേരിട്ടും സുബിൻ മാത്യു 29,32,715 രൂപയും സുബിന്‍ പറഞ്ഞതനുസരിച്ച് ചന്ദ്രന്‍ പലപ്പോഴായി 31,43,350 രൂപയും സാംസണ്‍ 1,96,350 രൂപയും ഉള്‍പ്പെടെ ആകെ 62,72,415 രൂപ കൈപ്പറ്റി. വസ്‌തു തരംമാറ്റി കൊടുക്കുകയോ വാങ്ങിയപണം തിരികെനല്‍കുകയോ ചെയ്യാതെ പരാതിക്കാരനെ വഞ്ചിച്ചതായും എഫ്‌ഐആറില്‍ പറയുന്നു. ​ ഫിലിപ്പ് മാത്യുവിന് റേഷന്‍കാര്‍ഡിനായി സുബിൻ 37,500 രൂപയും ലൊക്കേഷന്‍ സ്‌കെച്ചിന് വേണ്ടി 18,700 രൂപയും വാങ്ങിയതായും പരാതിയിയിൽ പറയുന്നു. ഭൂമി തരംമാറ്റിയെന്നും ഫിലിപ്പ് മാത്യുവിന്റെ പേരിലേക്ക് റവന്യൂ രേഖകളിൽ മാറിയെന്നും രജിസ്‌റ്റർചെയ്യുന്നതിന് സബ് രജിസ്ട്രാർക്ക് കൈക്കൂലി നൽകാൻ മൂന്നരലക്ഷം രൂപയും ആധാരച്ചെലവുകൾക്കായി അഞ്ചുലക്ഷം രൂപയും നൽകണമെന്ന്‌ ആവശ്യപ്പെട്ടു. സംശയംതോന്നിയ ഫിലിപ്പ്, നട്ടെല്ലിന് ശസ്‌ത്രക്രിയ കഴിഞ്ഞ് വിശ്രമിക്കുന്നതിനാല്‍ പിതൃസഹോദരനെ അയച്ച് തിരുവനന്തപുരത്ത് അന്വേഷിച്ചപ്പോഴാണ് ഇ‍ൗ ഓഫീസുകളില്‍ നടപടിക്രമങ്ങളൊന്നും ചെയ്‌തിട്ടില്ലെന്ന് മനസിലായത്‌. ചെങ്ങന്നൂർ പൊലീസ് അന്വേഷണം ആരംഭിച്ചു. ​നേതൃത്വത്തിന്‌ 
പരാതി നൽകിയിട്ടും ഫലമുണ്ടായില്ല 21 വര്‍ഷത്തെ പ്രവാസജീവിതത്തിന് ശേഷം നാട്ടിലെത്തിയ ഫിലിപ്പ് മാത്യുവിനെ സഹായിക്കാനെന്ന വ്യാജേനയാണ് ഇവര്‍ സമീപിച്ചത്. സുബിന്‍ മാത്യുവിനെതിരെ കോണ്‍ഗ്രസ്, യൂത്ത് കോണ്‍ഗ്രസ് നേതൃത്വത്തിനും പരാതി ഫിലിപ്പ് മാത്യു നല്‍കിയെങ്കിലും ഫലം ഉണ്ടായില്ല. നിലം ആയതിനാല്‍ തരംമാറ്റി ഫിലിപ്പ് മാത്യുവിന്റെ പേരിലേക്ക് മാറ്റുന്നത് വളരെ പ്രയാസമാണെന്നും അതിന് പണം ആവശ്യമാണെമെന്നും ധരിപ്പിച്ചാണ് സുബിന്‍ നാല്‌ തവണയായി ലക്ഷങ്ങള്‍ വാങ്ങിയത്. സര്‍ക്കാര്‍ ഓഫീസിലെ കാര്യം നടത്തിപ്പിനായി പല തവണയായി ലക്ഷങ്ങളാണ് ചന്ദ്രനും സാംസണും വാങ്ങിയത്.