വ്യാജ റേഷൻകാർഡ്‌: വിജിലൻസ്‌ അന്വേഷിക്കണമെന്ന്‌ ഭക്ഷ്യമന്ത്രി
തിരുവനന്തപുരം: വ്യാജ മുൻഗണന റേഷൻ കാർഡ്‌ അച്ചടിച്ച്‌ വിതരണം ചെയ്യപ്പെട്ട സംഭവത്തിൽ വിജിലൻസ്‌ അന്വേഷണം ആവശ്യപ്പെട്ട്‌ ഭക്ഷ്യമന്ത്രി ജി ആർ അനിൽ മുഖ്യമന്ത്രിക്ക്‌ കത്ത്‌ നൽകി. ബീമാപ്പള്ളി, പൂന്തുറ എന്നിവിടങ്ങളിലായി 146 വ്യാജ മുൻഗണന കാർഡുകളാണ്‌ വിതരണം ചെയ്യപ്പെട്ടത്‌. സംഭവവുമായി ബന്ധപ്പെട്ട്‌ ബീമാപ്പള്ളി റേഷൻ കടയുടമ സഹദ്‌ഖാൻ, കംപ്യൂട്ടർ സെന്റർ ഉടമ ഹസീബ്‌ ഖാൻ എന്നിവരെ വഞ്ചിയൂർ പൊലീസ്‌ അറസ്‌റ്റ്‌ ചെയ്‌തിരുന്നു.
മുൻഗണേതര വിഭാഗത്തിലെ വെള്ള, നീല കാർഡ്‌ ഉടമകളെയാണ്‌ മുൻഗണനാകാർഡ്‌ (പിങ്ക്‌) വിഭാഗത്തിലേക്ക്‌ മാറ്റിയത്‌. അപേക്ഷ നൽകിയശേഷം റേഷൻ കാർഡ്‌ മാനേജിങ്‌ വെബ്‌സൈറ്റിലെ പാസ്‌വേർഡും ഡാറ്റാബേസിലെ വിവരങ്ങളും ചോർത്തിയാണ്‌ കാർഡുകൾ മാറ്റിനൽകിയത്‌. ജൂൺ മുതലാണ്‌ തട്ടിപ്പ്‌. കാർഡുകാരിൽ പലരും റേഷൻകടയിൽനിന്ന്‌ ഭക്ഷ്യസാധനങ്ങളും വാങ്ങിയിട്ടുണ്ട്‌. ഭക്ഷ്യവകുപ്പിലെ ചില ഉദ്യോഗസ്ഥർക്ക്‌ തോന്നിയ സംശയത്തിലാണ്‌ പൊലീസിൽ പരാതി നൽകിയത്‌.
കേസിൽ കൂടുതൽ പേർ ഉൾപ്പെട്ടിട്ടുണ്ടെന്നാണ്‌ സംശയിക്കുന്നത്‌. ഭക്ഷ്യവകുപ്പിലെ ഏതെങ്കിലും ജീവനക്കാരുടെ സഹായം സംഘത്തിന്‌ ലഭിച്ചിട്ടുണ്ടോയെന്ന കാര്യവും പരിശോധിക്കുന്നുണ്ട്‌.
0 comments