ആത്മീയ ചികിത്സയുടെ മറവിൽ 2 കോടിയുടെ തട്ടിപ്പ്: 3 പേർ അറസ്റ്റിൽ

കുറ്റ്യാടി: ​ആത്മീയ ചികിത്സയുടെ മറവിൽ രണ്ടുകോടി രൂപയോളം തട്ടിയെടുത്ത കേസിൽ മൂന്നുപേർ അറസ്റ്റിൽ. മലപ്പുറം കോട്ടക്കലിൽ താമസിക്കുന്ന കോഡൂർ ഒറ്റത്തറ പി സി എച്ച് ശംസുദ്ദീൻ (43), പുലാമന്തോൾ വളപുരം മന്നേങ്കൽ കണ്ണന്തൊടി എം കെ മുഹമ്മദ് ബഷീർ (39), വളയം പടിഞ്ഞാറയിൽ റഫീഖ് (49) എന്നിവരെയാണ് തൊട്ടിൽപാലം പൊലീസ് അറസ്റ്റ് ചെയ്തത്.

തളീക്കര മണിയലംകണ്ടി മുഹമ്മദ് ആദിലിന്റെ പരാതിപ്രകാരമാണ് അറസ്റ്റ്. പലതവണയായി വാങ്ങിയ തുകയിൽ ഒന്നേമുക്കാൽ കോടിയോളം രൂപ ആദിലിന് തിരിച്ചുനൽകാനുണ്ട്. വ്യാജ ചികിത്സ, ആത്മീയ ചൂഷണത്തിന്റെ മറവിലുള്ള സാമ്പത്തിക തട്ടിപ്പ് എന്നിവ സംബന്ധിച്ച് ആദിൽ മുഖ്യമന്ത്രിക്ക് നൽകിയ പരാതിയെ തുടർന്നാണ് പൊലീസ് കേസെടുത്തത്. ബന്ധുവിന്റെ ചികിത്സയുമായി ബന്ധപ്പെട്ടാണ് ആദിൽ പ്രതികളെ സമീപിക്കുന്നത്. ശംസുദ്ദീൻ ഉസ്താദും ശൈഖുമാണെന്ന് പറഞ്ഞ് പരിചയപ്പെടുത്തിയും മാരകരോഗങ്ങൾ വരെ സുഖപ്പെടുത്തിയിട്ടുണ്ടെന്ന് വിശ്വസിപ്പിച്ചുമാണ് പണം കൈക്കലാക്കിയതെന്ന് പരാതിയിൽ പറയുന്നു. തിരികെ നൽകാമെന്ന് പറഞ്ഞാണ് വിവിധ ആവശ്യങ്ങൾക്ക് പണം വാങ്ങിയത്. പ്രതികളുടെ അക്കൗണ്ടിലേക്ക് അയച്ചും പണമായും നൽകി.

രണ്ടു കോടി വാങ്ങിയതിൽ 26 ലക്ഷം മാത്രമാണ് തിരിച്ചുകിട്ടിയതെന്ന് ആദിൽ പറഞ്ഞു. പണം തിരികെ ചോദിച്ചാൽ രോഗം മൂർച്ഛിക്കുമെന്നും ഭവിഷ്യത്ത് നേരിടേണ്ടിവരുമെന്നും ഭീഷണിപ്പെടുത്തി. പ്രതികളിൽ ശംസുദ്ദീൻ മലപ്പുറത്തെ ഒരു വിദ്യാഭ്യാസ സ്ഥാപന ട്രസ്റ്റ് വൈസ് പ്രസിഡന്റും ബഷീർ പ്രിൻസിപ്പലുമാണെന്നും വിശ്വസിപ്പിച്ചുവെന്നും ആദിൽ പറഞ്ഞു. പ്രതികൾ നേരത്തേ കോഴിക്കോട് സെഷൻസ് കോടതിയിൽ മുൻകൂർ ജാമ്യാപേക്ഷ നൽകിയതിനാൽ കോടതി നിർദേശിച്ച ഉപാധികളോടെ ജാമ്യം ലഭിച്ചിട്ടുണ്ട്. ഇതിനെതിരെ ഹൈക്കോടതിയെ സമീപിക്കുമെന്ന് ആദിൽ പറഞ്ഞു.

​