തദ്ദേശ തെരഞ്ഞെടുപ്പ്‌ ; യൂത്ത് കോൺഗ്രസ് ഒ‍ൗട്ട്‌ , പ്രതിഷേധം, രാജി
കൊച്ചി
ജില്ലയിലെ തദ്ദേശ തെരഞ്ഞെടുപ്പിൽ കോർപറേഷനിലടക്കം സ്ഥാനാർഥിത്വം നിഷേധിച്ചതിൽ യൂത്ത് കോൺഗ്രസിൽ പ്രതിഷേധവും അമർഷവും. യൂത്ത് കോൺഗ്രസ് നേതൃത്വം ഇതിനകം പ്രതിഷേധം പരസ്യമാക്കി. ബഹിഷ്‌കരണ ഭീഷണിയും മുഴക്കിയിട്ടുണ്ട്‌. പലരും പാർടി അംഗത്വവും ഭാരവാഹിത്വവും ജനപ്രതിനിധി സ്ഥാനവുമെല്ലാം രാജിവയ്‌ക്കുകയാണ്‌.
പാർടിക്കായി തല്ലുകൊണ്ടതിൽ അർഥമില്ലെന്ന്‌ മനസ്സിലായെന്നും ഒരു വിലയും യൂത്ത് കോൺഗ്രസിന്‌ നൽകിയില്ലെന്നും സംസ്ഥാന സെക്രട്ടറി സഞ്‌ജയ്‌ ജെയിംസ്‌ തുറന്നടിച്ചു. നേതാക്കളുടെ അടുപ്പക്കാരെയാണ്‌ കൊച്ചി കോർപറേഷനിൽ സ്ഥാനാർഥികളാക്കിയത്‌. നേതാക്കൾ ചെറുപ്പക്കാരായ സ്ഥാനാർഥികളെന്ന്‌ പറയുന്നവർക്ക്‌ യൂത്ത് കോൺഗ്രസുമായി ബന്ധമില്ല. കോർപറേഷനിലേക്ക്‌ ആദ്യലിസ്‌റ്റിൽ ഞാനടക്കം അഞ്ചുപേരുടെ പട്ടിക നൽകിയിരുന്നു. അവസാനം ഒരു പേരായി. യൂത്ത് കോൺഗ്രസ് സംസ്ഥാന പ്രസിഡന്റ്‌ അതിനായി നൽകിയ കത്തിനും വില നൽകാതെയാണ്‌ സ്ഥാനാർഥികളെ തീരുമാനിച്ചത്‌. ട്വന്റി 20 വിട്ടുവന്നയാൾക്കും സ്ഥാനാർഥിത്വം നൽകി. കോൺഗ്രസ് നേതൃത്വം എൽഡിഎഫിനെ കണ്ടുപഠിക്കണം. യുവതീയുവാക്കൾക്ക്‌ അവർ നല്ല പ്രാതിനിധ്യം നൽകിയെന്നും സഞ്‌ജയ്‌ പറഞ്ഞു.
യൂത്ത് കോൺഗ്രസ് അങ്കമാലി മണ്ഡലം പ്രസിഡന്റ്‌ റിൻസ്‌ ജോസ്‌ രാജിവച്ചിരുന്നു. അങ്കമാലി നഗരസഭയിലേക്ക്‌ സ്ഥാനാർഥിയാക്കുന്നതിൽ യൂത്ത് കോൺഗ്രസുകാരെ തഴഞ്ഞതിനെ തുടർന്നായിരുന്നു പ്രസിഡന്റുസ്ഥാനം രാജിവച്ചത്‌. യുവാക്കൾക്ക്‌ അവസരം നൽകാത്തതിൽ പ്രതിഷേധിച്ച്‌ നേരത്തേ കൊച്ചി ക‍ൗൺസിലർ ബാസ്‌റ്റിൻ ബാബു ഉൾപ്പെടെ സമാനമായ കാരണം ചൂണ്ടിക്കാട്ടി രാജിവച്ചിരുന്നു. സീറ്റെല്ലാം നേതാക്കളുടെ പെട്ടിതാങ്ങികൾക്കാണെന്ന്‌ തുറന്നടിച്ച ബാസ്‌റ്റിൻ, വിമതനായി മത്സരിക്കുമെന്ന്‌ പ്രഖ്യാപിച്ചു. ഭൂരിഭാഗം ഇടങ്ങളിലും യൂത്ത് കോൺഗ്രസിനെ തഴയുകയായിരുന്നു നേതൃത്വം. പേരിന്‌ ചുരുക്കം ചിലയിടങ്ങളിലാണ്‌ അവസരം നൽകിയിരുന്നത്‌.
മുൻ യൂത്ത് കോൺഗ്രസ് കളമശേരി നിയോജകമണ്ഡലം പ്രസിഡന്റും കളമശേരി ബ്ലോക്ക് കോൺഗ്രസ് കമ്മിറ്റി വൈസ് പ്രസിഡന്റുമായിരുന്ന അൻവർ കരീം ഞാക്കടയും പാർടി വിട്ടിരുന്നു. യുവാക്കളെ നിശ്ശബ്ദരാക്കുന്ന നയത്തിനെതിരെയുള്ള പ്രതിഷേധംകൂടിയായിരുന്നു രാജി. 27–ാം വാർഡ്‌ കോൺഗ്രസ് ബൂത്ത്‌ പ്രസിഡന്റ്‌ വിനോദ്‌ നെൽസണും പാർടി വിട്ടു.
യൂത്ത് കോൺഗ്രസിൽ ജാതി അധിക്ഷേപം ; സംസ്ഥാന സെക്രട്ടറിക്കെതിരെ മണ്ഡലം സെക്രട്ടറി പരാതി നൽകി
യൂത്ത് കോൺഗ്രസ് സംസ്ഥാന സെക്രട്ടറി പി എ നോബൽകുമാർ ജാതി അധിക്ഷേപം നടത്തിയെന്നാരോപിച്ച്‌ വൈപ്പിൻ നിയോജകമണ്ഡലം ജനറൽ സെക്രട്ടറി കെ ആർ രാഹുൽദേവ്‌ ഡിസിസിക്ക്‌ പരാതി നൽകി.
കഴിഞ്ഞദിവസം സ്ഥാനാർഥിനിർണയവുമായി ബന്ധപ്പെട്ട്‌ നടന്ന കോർകമ്മിറ്റി യോഗത്തിനുശേഷം പുറത്തിറങ്ങിയ രാഹുലിനെ ജാതിപ്പേരുവിളിച്ച്‌ ആക്ഷേപിച്ചു. കോർകമ്മിറ്റി യോഗത്തിൽ തന്റെ അച്ഛനെ അധിക്ഷേപിച്ചശേഷമാണിത്‌. ‘‘ഇനി നീയും നിന്റെ തന്തയും അരയന്മാരോടൊപ്പം കടലിൽ ചാള പിടിക്കാൻ പോയാൽ മതി, റിട്ടയറായ അയാൾ കൊടിപിടിക്കാതെ ഇനി പങ്കായം പിടിക്കട്ടെ’’ എന്നൊക്കെയായിരുന്നു ആക്ഷേപമെന്ന്‌ പരാതിയിൽ പറയുന്നു. തദ്ദേശ തെരഞ്ഞെടുപ്പിൽ അച്ഛനും മകനും സീറ്റ്‌ നൽകുമെന്നുപറഞ്ഞ്‌ പ്രീണിപ്പിച്ചശേഷം രണ്ടുപേർക്കും സീറ്റ്‌ നൽകാതെ പാർടി കബളിപ്പിച്ചെന്നും കത്തിലുണ്ട്‌.
ഡിവൈഎഫ്‌ഐ, സിപിഐ എം പ്രവർത്തകരെ ആക്രമിച്ച കേസിൽ നോബൽകുമാർ ശിക്ഷിക്കപ്പെട്ടയാളാണെന്നും ഇപ്പോൾ ജാമ്യത്തിലിറങ്ങി പാർടിയിൽ ഗുണ്ടാപ്രവർത്തനം നടത്തുകയാണെന്നും കത്തിൽ പറയുന്നു.
Related News
Dont Miss it
0 comments