എൽഡിഎഫ്‌ തെരഞ്ഞെടുപ്പ്‌ 
 റാലികൾക്ക്‌ നാളെ തുടക്കം

കാസർകോട്‌

കുടുംബയോഗങ്ങളും ഒന്നാംഘട്ട സ്ഥാനാർഥി പര്യടനവും പൂർത്തിയാക്കി എൽഡിഎഫ്‌ തിങ്കളാഴ്‌ച മുതൽ പഞ്ചായത്ത്‌, മുനിസിപ്പൽ തെരഞ്ഞെടുപ്പ്‌ റാലികളിലേക്ക്‌. സിപിഐ എം സംസ്ഥാന സെക്രട്ടറി എം വി ഗോവിന്ദൻ ഉദ്‌ഘാടനം ചെയ്യുന്ന കുറ്റിക്കോൽ പഞ്ചായത്ത്‌ റാലിയാണ്‌ ആദ്യപരിപാടി. തിങ്കളാഴ്‌ച വൈകിട്ട്‌ 4.30ന്‌ കുറ്റിക്കോൽ ട‍ൗണിലാണിത്‌. സിപിഐ എം കേന്ദ്രകമ്മറ്റി അംഗങ്ങളായ ഇ പി ജയരാജൻ, പി കെ ശ്രീമതി, കെ കെ ശൈലജ, സംസ്ഥാന സെക്രട്ടറിയറ്റംഗം എം വി ജയരാജൻ, മുതിർന്ന നേതാവ്‌ പി കരുണാകരൻ ഉൾപ്പെടെയുള്ളവർ റാലികളിൽ പങ്കെടുക്കും. കൂടാതെ ജോൺ ബ്രിട്ടാസ്‌ എംപി, ജെയ്‌ക്‌ സി തോമസ്‌, കെ ടി ജലീൽ, ടി ശശിധരൻ, എസ്‌എഫ്‌ഐ സംസ്ഥാന പ്രസിഡന്റ്‌ എം ശിവപ്രസാദ്‌, സെക്രട്ടറി പി എസ്‌ സഞ്‌ജീവ്‌ തുടങ്ങിയ നേതാക്കളും റാലികളിൽ പങ്കെടുക്കും. കലാസാംസ്‌കാരിക പ്രവർത്തകരായ ഗായത്രി വർഷ ഉൾപ്പെടെയുള്ളവരും സിപിഐ നേതാക്കളായ സി എൻ ചന്ദ്രൻ, കെ പ്രകാശ്‌ബാബു തുടങ്ങിയ നേതാക്കളും ജില്ലയിൽ എത്തുന്നുണ്ട്‌. നീലേശ്വരം മുനിസിപ്പൽ റാലി അഞ്ചിന്‌ വൈകിട്ട്‌ 4.30നാണ്‌. കാസർകോട്‌, കാഞ്ഞങ്ങാട്‌ മുനിസിപ്പൽ റാലികൾ ഏഴിന്‌ വൈകിട്ടും നടക്കും. ചൊവ്വാഴ്‌ച അഞ്ച്‌ കേന്ദ്രങ്ങളിൽ എൽഡിഎഫ്‌ റാലി നടക്കും. ഉദുമ, പള്ളിക്കര റാലികൾ സിപിഐ എം കേന്ദ്രകമ്മറ്റി അംഗം ഇ പി ജയരാജൻ ഉദ്‌ഘാടനം ചെയ്യും. പുല്ലൂർ പെരിയ, പടന്ന, പിലിക്കോട്‌ റാലികൾ കേന്ദ്രകമ്മിറ്റിയംഗം കെ കെ ശൈലജ പങ്കെടുക്കും. കുടുംബയോഗങ്ങൾ പിന്നിട്ട്‌ റാലികളിലേക്ക്‌ കാസർകോട്‌ ചിട്ടയായ പ്രചാരണ പ്രവർത്തനം പിന്നിട്ടാണ്‌ എൽഡിഎഫ്‌ ജില്ലയിൽ തെരഞ്ഞെടുപ്പ്‌ റാലികളിലേക്ക്‌ കടക്കുന്നത്‌. ഓരോ പഞ്ചായത്ത്‌, മുനിസിപ്പൽ വാർഡുകളിലും പത്തുവീതം കുടുംബയോഗങ്ങൾ ഇതിനകം പൂർത്തിയായി. സർക്കാരിന്റെ ജനക്ഷേമ പ്രവർത്തനങ്ങളും ഇടതുപക്ഷം ഉയർത്തുന്ന വികസനരാഷ്ട്രീയവും മതനിരക്ഷേപ നിലപാടുകളും വിശദീകരിക്കുന്ന കുടുംബയോഗങ്ങളിൽ പതിനായിരങ്ങൾ പങ്കാളിയായി. സ്ഥാനാർഥി നിർണയം പൂർത്തിയായ ഘട്ടം മുതൽ എൽഡിഎഫ്‌ വീടുകളും സ്ഥാപനങ്ങളും കയറിയിറങ്ങിയുള്ള പ്രചാരണം തുടങ്ങി. മുന്നണിയിലെ ഉഭയകക്ഷി ചർച്ചകളും സീറ്റുവിഭജനവും തർക്കങ്ങളില്ലാതെ അതിവേഗം പൂർത്തിയാക്കിയാണ്‌ എൽഡിഎഫ്‌ പ്രചാരണരംഗത്ത്‌ സജീവമായത്‌. സമൂഹമാധ്യമങ്ങളും നവമാധ്യമങ്ങളും ഉപയോഗിച്ചുള്ള പ്രചാരണത്തിലും മുന്നിലാണ്‌. സ്ഥാനാർഥികളെ പരിചയപ്പെടുത്തുന്ന ചെറുവീഡിയോകൾക്കൊപ്പം സർക്കാരിന്റെ ജനക്ഷേമ പ്രവർത്തനങ്ങളും ആനുകാലിക രാഷ്ട്രീയസംഭവ വികാസങ്ങളും റീലുകളായി ജനങ്ങളിലെത്തുന്നു. റാലികൾക്ക്‌ സമാന്തരമായി സ്ഥാനാർഥികളുടെ രണ്ടാംഘട്ട പര്യടനത്തിനും അടുത്തയാഴ്‌ച തുടക്കമാവും. വാർഡ്‌തല പൊതുയോഗങ്ങൾ ഉൾപ്പെടെയുള്ളവയും സംഘടിപ്പിക്കും. തദ്ദേശ തെരഞ്ഞെടുപ്പിൽ മികച്ച പ്രകടനം നടത്തിയാൽ വരാനിരിക്കുന്ന നിയമസഭാ തെരഞ്ഞെടുപ്പിനെ ആത്മവിശ്വാസത്തോടെ നേരിടാനാകുമെന്നതിനാൽ സൂക്ഷ്‌മതയോടെയുള്ള ആസൂത്രണം എല്ലാതലങ്ങളിലുമുണ്ട്‌. കഴിഞ്ഞ തവണ യുഡിഎഫിൽനിന്ന്‌ പിടിച്ചെടുത്ത ജില്ലാ പഞ്ചായത്തിൽ കൂടുതൽ സീറ്റുകളോടെ വിജയം ഉറപ്പിക്കുകയാണ്‌ എൽഡിഎഫിന്റെ പ്രധാന ലക്ഷ്യം. നിലവിൽ നീലേശ്വരം, കാഞ്ഞങ്ങാട്‌ നഗരസഭകൾ എൽഡിഎഫിനും കാസർകോട്‌ യുഡിഎഫിനുമാണ്‌. ആറ്‌ ബ്ലോക്ക്‌ പഞ്ചായത്തുകളിൽ കാഞ്ഞങ്ങാട്‌, നീലേശ്വരം, കാറഡുക്ക, പരപ്പ എന്നിവ എൽഡിഎഫ-ിനാണ്‌. കാസർകോടും മഞ്ചേശ്വരവുമാണ്‌ യുഡിഎഫിന്‌. 38 പഞ്ചായത്തുകളിൽ 19 എണ്ണവും എൽഡിഎഫിനാണ്‌. 15 ഇടത്ത്‌ യുഡിഎഫിനും മൂന്നിടത്ത്‌ എൻഡിഎയ്‌ക്കുമാണ്‌ ഭൂരിപക്ഷം. മൂന്നിടത്ത്‌ ആർക്കും ഭൂരിപക്ഷമില്ല. ചരിത്രത്തിലെ ഏറ്റവും മികച്ച പ്രകടനം നടത്തിയ കഴിഞ്ഞ തെരഞ്ഞെടുപ്പിലെ നേട്ടം കൂടുതൽ മികവോടെ ആവർത്തിക്കുകയാണ്‌ എൽഡിഎഫിന്റെ ലക്ഷ്യം. സീറ്റ്‌ വിഭജനത്തിൽ ആരംഭിച്ച രൂക്ഷമായ തർക്കം തെരഞ്ഞെടുപ്പിന്‌ രണ്ടാഴ്‌ച ശേഷിക്കെയും പരിഹരിക്കാനാകാതെ യുഡിഎഫ്‌ പ്രയാസപ്പെടുകയാണ്‌. പലയിടത്തും മുസ്ലിംലീഗ്‌ പിണങ്ങി. ഡിസിസി വൈസ്‌പ്രസിഡന്റ്‌ ജയിംസ്‌ പന്തമാക്കൽ ഉൾപ്പെടെയുള്ള നേതാക്കളുടെ രാജിയും ഡിസിസി ഓഫീസിലെ സംഘട്ടനവും യുഡിഎഫിന്‌ പ്രതിസന്ധിയായി. എൻഡിഎയാകട്ടെ പുനസംഘടന സൃഷ്ടിച്ച സംഘനാപ്രതിസന്ധികളിൽ നിന്ന്‌ കരകയറാനാവാതെ കുഴയുകയാണ്‌. ബിജെപിയുടെ സംഘടനാസംവിധാനവും പ്രചാരണവും തീർത്തും നിർജീവമാണ്‌. എൻഡിഎയിലെ ഘടകകക്ഷികൾ ജില്ലയിൽ ചിത്രത്തിലില്ല.​