‘ജയിക്കും, പിന്നപ്പെന്താ’

പാലക്കാട്‌

കേരളശേരിയിൽ പ്രചാരണത്തിനിടെ ഗോപാലകൃഷ്ണേട്ടന്റെ ചായക്കടയിൽ കേറിയതായിരുന്നു ജില്ലാ പഞ്ചായത്ത്‌ കോങ്ങാട്‌ ഡിവിഷൻ എൽഡിഎഫ്‌ സ്ഥാനാർഥി പി ആർ ശോഭന. ‘‘നിങ്ങളിപ്പോ ഇങ്ങനെ ഓടേണ്ട കാര്യോന്നൂല്ല. ജയിക്കും പിന്നപ്പെന്താ. അവിടിരുന്ന്‌ ചായ കുടിച്ചിട്ട്‌ പോകീൻ. എല്ലാരും വരീൻ.’’– ചായ ഗ്ലാസിലാക്കി ഗോപാലകൃഷ്ണേട്ടൻ തുടർന്നു. ‘ദേ ഇ‍ൗ കാണുന്ന പഞ്ചായത്ത്‌ ഓഫീസില്‌ വൈസ്‌ പ്രസിഡന്റായ കാലത്തും ഇവരിങ്ങനെ നാട്ടുകാർക്കുവേണ്ടി ഓട്ടത്തിലാ’’. നാൽപ്പത്‌ കൊല്ലമായി കാർഷികഗ്രാമത്തിന്റെ പരിചിതമുഖമാണ്‌ പി ആർ ശോഭന. 2015–20 കാലയളവിൽ കേരളശേരി പഞ്ചായത്ത്‌ വൈസ്‌പ്രസിഡന്റ്‌. ഭിന്നശേഷിക്കാരുടെ സംഘടനയായ ഡിഫറന്റിലി ഏബിൾഡ്‌ വെൽഫെയർ അസോസിയേഷൻ സംസ്ഥാന കമ്മിറ്റി അംഗം, കർഷകസംഘം ഏരിയ വൈസ്‌ പ്രസിഡന്റ്‌, മഹിളാ അസോസിയേഷൻ വില്ലേജ്‌ കമ്മിറ്റി അംഗം, മൂന്ന്‌ ടേമുകളിലായി ക്ഷീരസംഘം ഡയറക്ടർ ബോർഡ്‌ അംഗം തുടങ്ങി വിവിധ മേഖലകളിൽ പ്രവൃത്തിപരിചയം. മുണ്ടൂര്‍, കോങ്ങാട്, കേരളശേരി, മണ്ണൂര്‍ പഞ്ചായത്തുകളിലെ 53 വാര്‍ഡുകൾ ഉൾപ്പെടുന്നതാണ്‌ കോങ്ങാട്‌ ഡിവിഷൻ. കഴിഞ്ഞ തെരഞ്ഞെടുപ്പിൽ എൽഡിഎഫിലെ പി പ്രശാന്ത്‌ (ഭൂരിപക്ഷം 8,261 വോട്ട്‌) ആണ്‌ വിജയിച്ചത്‌. കോങ്ങാട് ആറാട്ടുകുളം റോഡ്‌ പുനരുദ്ധാരണം (30 ലക്ഷം), വനിതാ ജിംനേഷ്യം (15 ലക്ഷം), മിനി മാസ്റ്റ് ലൈറ്റ് (30 ലക്ഷം), കുട്ടികളുടെ പാര്‍ക്ക് (10 ലക്ഷം), പത്തിരിപ്പാല ഹൈസ്‌കൂളില്‍ കെമിസ്ട്രി ലാബ് (15 ലക്ഷം), വാട്ടര്‍ എടിഎം, ഹരിതകര്‍മ സേനയ്‌ക്ക് വാഹനം വാങ്ങാന്‍ (20 ലക്ഷം) തുടങ്ങി നിരവധി വികസനമാണ്‌ അഞ്ചുവർഷം നടപ്പാക്കിയത്‌.