എസ്‌എഫ്‌ഐ പ്രവർത്തകരെ 
ബംഗാളിൽ പൊലീസ്‌ തല്ലിച്ചതച്ചു

കൊൽക്കത്ത : പശ്ചിമബംഗാൾ വിദ്യാഭ്യാസ മേഖലയിലെ അഴിമതിക്കും കെടുകാര്യസ്ഥതയ്‌ക്കുമെതിരെ വിദ്യാഭ്യാസ വകുപ്പ് ആസ്ഥാനമായ വികാഷ് ഭവനിലേക്ക് മാർച്ച് നടത്തിയ എസ്എഫ്ഐ പ്രവർത്തകർക്കുനേരെ പൊലീസിന്റെ ക്രൂരമർദനം. കൃത്യമായി പരീക്ഷകൾ നടത്താതെയും ആവശ്യമായ അധ്യാപകരെ നിയമിക്കാതെയും വിദ്യാഭ്യാസവകുപ്പ്‌ തുടരുന്ന അനാസ്ഥ അവസാനിപ്പിക്കണമെന്നും ദീർഘകാലമായി മുടങ്ങിക്കിടക്കുന്ന യൂണിയൻ തെരഞ്ഞെടുപ്പ്‌ നടത്തണമെന്നും ആവശ്യപ്പെട്ടാണ് വിദ്യാർഥികള്‍ പ്രതിഷേധിച്ചത്. നിരവധി പ്രവർത്തകരെ അറസ്റ്റ്ചെയ്‌തു. വിദ്യാഭ്യാസ മന്ത്രിക്ക്‌ നിവേദനം നൽകിയശേഷം പിരിഞ്ഞുപൊയ്‌ക്കൊള്ളാമെന്ന്‌ വിദ്യാർഥികൾ അറിയിച്ചെങ്കിലും മാർച്ച്‌ തടഞ്ഞ പൊലീസ്‌ മർദിക്കുകയായിരുന്നു.

വിവരമറിഞ്ഞ്‌ ഡിവൈഎഫ്‌ഐ, ജനാധിപത്യ മഹിളാ അസോസിയേഷൻ നേതാക്കളുൾപ്പടെ കൂടുതൽ പ്രവർത്തകർ എത്തിയതോടെ അറസ്റ്റ് ചെയ്‌തവരെ വിട്ടയക്കാൻ പോലീസ് നിർബന്ധിതരായി.