അർഹമായ വിഹിതം ലഭിക്കാൻ നിരന്തരം ഇടപെടും; യുഡിഎഫ് എംപിമാർ കേരളത്തിനിട്ട് പാരപണിയുന്നു: ജോൺ ബ്രിട്ടാസ്

ന്യൂഡൽഹി: കേരളത്തിന് അർഹമായ കേന്ദ്രവിഹിതം ലഭിക്കാൻ എംപി എന്ന നിലയിൽ നിരന്തരം സമ്മർദം ചെലുത്തുമെന്ന് ഡോ.ജോൺ ബ്രിട്ടാസ് പറഞ്ഞു. തടഞ്ഞുവെക്കപ്പെട്ട സമ​ഗ്രശിക്ഷ അഭിയാൻ (എസ്എസ്എ) ഫണ്ട് ലഭ്യമാക്കണമെന്നാണ് താൻ രാജ്യസഭയിൽ ആവശ്യപ്പെട്ടത്. കേരളത്തിന്റെ ആവശ്യങ്ങൾക്കായി കേന്ദ്രമന്ത്രിമാരെ കാണും. അത് തന്റെ ചുമതലയാണെന്നും ജോൺ ബ്രിട്ടാസ് എംപി പറഞ്ഞു.

എല്ലാ പാർലമെന്റ് സമ്മേളനങ്ങൾക്കും മുൻപായി മുഖ്യമന്ത്രി കേരളത്തിലെ എംപിമാരുടെ യോ​ഗം വിളിക്കും. തടഞ്ഞുവെക്കപ്പെട്ട ഫണ്ടുകളുടെ കണക്ക് അവതരിപ്പിക്കും. അതനുസരിച്ച് ഇടതുപക്ഷ എംപിമാർ കേരളത്തിനായി ഇടപെടും. പക്ഷേ, ഫണ്ടിനായി പരിശ്രമിക്കാം എന്ന് യോ​ഗത്തിൽ ഉറപ്പുപറയുന്ന യുഡിഎഫ് എംപിമാർ പുറത്തുപോയി കേരളത്തിനിട്ട് പാരപണിയുകയാണ് ചെയ്യുന്നത്.

ഫാസിസ്റ്റ് ഭരണത്തെ എതിർക്കുന്നതിൽ ഒരു കോൺ​ഗ്രസുകാരുടെയും മുസ്ലിംലീ​ഗുകാരുടെയും സർട്ടിഫിക്കറ്റ് തനിക്ക് വേണ്ട. നരേന്ദ്രമോദിയുടെ അനു​ഗ്രഹം വാങ്ങി തിരിച്ചുപോയ ആളാണ് പി കെ കുഞ്ഞാലിക്കുട്ടി. കേരളത്തിന്റെ അംബാസിഡർമാർ രാജീവ് ചന്ദ്രശേഖരനും വി മുരളീധരനുമാണെന്ന് പറഞ്ഞവരാണ് ലീ​ഗുകാർ. ചന്ദ്രികയ്ക്കെതിരെയുള്ള ഇഡി കേസ് എങ്ങനെയാണ് ആവിയായിപ്പോയത്? ബിജെപിയുമായി നിരന്തരം സന്ധിചെയ്യുന്നവരാണ് യുഡിഎഫ്. കെ സി വേണു​ഗോപാൽ തന്റെ രാജ്യസഭാസ്ഥാനം കൊടുത്തത് കോൺ​ഗ്രസിൽനിന്ന് ബിജെപിയിൽ ചേർന്ന വിദ്വാനാണ്. അയോധ്യയിലെ പ്രാണപ്രതിഷ്ഠയെക്കുറിച്ചുള്ള ചർച്ച പാർലമെന്റിൽ നടന്നപ്പോൾ പ്രധാനമന്ത്രിക്ക് സ്തുതിപാടിയവരാണ് കോൺ​ഗ്രസുകാർ. ഓരോദിവസവും മോദിസ്തുതി നടത്തുന്നയാളാണ് കോൺ​ഗ്രസിന്റെ പ്രവർത്തകസമിതിയം​ഗമായ ശശി തരൂർ. ആർഎസ്എസിന്റെ ബി ടീമായി മാറിയ കോൺ​ഗ്രസിന്റെയും ലീ​ഗിന്റെയും നേതാക്കൾക്ക് മുഖംരക്ഷിക്കാനാണ് തനിക്കെതിരെ സൈബർ അധിക്ഷേപം നടത്തുന്നതെന്നും ബ്രിട്ടാസ് എംപി മാധ്യമങ്ങളോട് പ്രതികരിച്ചു.