ബംഗാളിൽ ബിജെപി 
അംഗത്വ കാമ്പയിൻ പാളി

കൊൽക്കത്ത

ബംഗാളിൽ അംഗത്വം വർധിപ്പിക്കാനുള്ള ബിജെപിയുടെ ശ്രമത്തിന്‌ വൻ തിരിച്ചടി. ഒരു കോടി അംഗങ്ങൾ എന്ന ലക്ഷ്യത്തോടെ തുടങ്ങിയ കാമ്പയിൻ മൂന്ന് മാസം പിന്നിട്ടിട്ടും മൂന്നിലൊന്നുപോലും പൂർത്തിയാക്കാൻ കഴിയാതെ നേതൃത്വം വട്ടം കറങ്ങുന്നു. ഒക്ടോബറിൽ ആരംഭിച്ച ക്യാമ്പയിൽ പലതവണ നീട്ടി ഡിസംബർ 31 വരെ ആക്കി.

കേന്ദ്ര ആഭ്യന്തരമന്ത്രി അമിത് ഷായാണ് സംസ്ഥാനത്തു കൊട്ടിഘോഷിച്ച്‌ ക്യാമ്പയിന്‌ തുടക്കം കുറിച്ചത്. നവംബർ 15നകം ഒരു കോടി അംഗങ്ങൾ എന്ന ലക്ഷ്യവും ഷായാണ്‌ തീരുമാനിച്ചത്‌. ഇതുവരെ 30 ലക്ഷം ആളുകളെ പോലും ചേർക്കാൻ കഴിഞ്ഞില്ല.

പുരുളിയ, ബാങ്കുറ, ബിർഭും, നോർത്ത്–-സൗത്ത് 24 പർഗാനസ്, ഈസ്റ്റ്–-വെസ്റ്റ് മേദിനിപ്പുർ തുടങ്ങിയ ജില്ലകളിൽ 25000ന് താഴെമാത്രമാണ് പുതിയ അംഗങ്ങളെ ലഭിച്ചത്. പ്രതിപക്ഷ നേതാവ് സുവേന്ദു അധികാരിയുടെ ജില്ലയാണ്‌ ഈസ്റ്റ് മേദിനിപ്പുർ.

സംസ്ഥാനത്തിന്റെ ചുമതലയുള്ള ബിജെപി ദേശീയ ജനറൽ സെക്രട്ടറി സുനിൽ ബൻസാൽ ജില്ലാ നേതാക്കളുടെ യോഗത്തിൽ കടുത്ത അതൃപ്‌തി രേഖപ്പെടുത്തി.