ബിഹാറിൽ രണ്ടാം ഘട്ട വോട്ടെടുപ്പ് സമാധാനപരം, എൻഡിഎ വെല്ലുവിളി നേരിട്ട 48 മണ്ഡലങ്ങൾ

പട്ന: ബിഹാർ നിയമസഭാ തെരഞ്ഞെടുപ്പിന്റെ രണ്ടാഘട്ടത്തിലും ആവേശം കൈവിടാതെ വോട്ടർമാർ. നവംബർ ആറിന് നടന്ന ഒന്നാം ഘട്ടത്തിലെന്ന പോലെ രാവിലെ തന്നെ മികച്ച പോളിങ്. രാവിലെ 11 മണിയോടെ 31.38% പോളിംഗ് രേഖപ്പെടുത്തി.

കിഷൻഗഞ്ച് 34.74 ശതമാനത്തോടെ മുന്നിലെത്തി. ഗയ 34.07%, ജാമുയി 33.69%  എന്നിങ്ങനെയും പോളിങ് രേഖപ്പെടുത്തി.

ബീഹാറിലെ 122 നിയമസഭാ സീറ്റുകളിലേക്കുള്ള അവസാന ഘട്ട വോട്ടെടുപ്പാണ് ചൊവ്വാഴ്ച നടക്കുന്നത്. 17.4 ദശലക്ഷം സ്ത്രീകൾ ഉൾപ്പെടെ 37 ദശലക്ഷത്തിലധികം വോട്ടർമാർ 45,399 പോളിംഗ് സ്റ്റേഷനുകളിലായി വോട്ട് ചെയ്യുന്നു. 20 ജില്ലകളിൽ ഉൾപ്പെടുന്ന മണ്ഡലങ്ങളാണ് ഇവയിൽ ഉൾപ്പെടുന്നത്.

ഈ ഘട്ടത്തിൽ എൻഡിഎ തിരിച്ചടി നേരിട്ട മഗധ്, മിഥിലാഞ്ചൽ, സീമാഞ്ചൽ, ഷഹാബാദ്, തിർഹട്ട് മേഖലകളിലെ നിയമസഭാ മണ്ഡലങ്ങൾ ഉൾപ്പെടുന്നു. 122 മണ്ഡലങ്ങളിൽ 101 എണ്ണം ജനറൽ മണ്ഡലങ്ങളാണ്, 19 എണ്ണം പട്ടികജാതി (എസ്‌സി) യ്ക്കും രണ്ടെണ്ണം പട്ടികവർഗ (എസ്‌ടി) യ്ക്കും സംവരണം ചെയ്‌തവയാണ്.

കഴിഞ്ഞ നിയമസഭാ തെരഞ്ഞെടുപ്പിൽ മഗധ്, ഷഹാബാദ് മേഖലകളിൽ എൻ‌ഡി‌എ പ്രകടനം മോശമായിരുന്നു. അവിടെ 48 മണ്ഡലങ്ങളിൽ എട്ടെണ്ണം മാത്രമാണ് അവർ വിജയിച്ചത്.

പോളിങ് ഉയർന്നു

ഒന്നാം ഘട്ടത്തിൽ 18 ജില്ലകളിലായി 121 മണ്ഡലങ്ങളിലായിരുന്നു വോട്ടെടുപ്പ്. 64.66% പോളിംഗ് രേഖപ്പെടുത്തി. ബീഹാറിലെ എക്കാലത്തെയും ഉയർന്ന പോളിംഗ്. ബീഹാറിലെ വോട്ടർ പട്ടികയുടെ സ്‌പെഷ്യൽ ഇന്റൻസീവ് റിവിഷൻ (എസ്‌ഐആർ) പ്രകാരം 78.9 ദശലക്ഷത്തിൽ നിന്ന് 74.2 ദശലക്ഷമായി കുറഞ്ഞതിന് ശേഷമാണ് തെരഞ്ഞെടുപ്പ് നടന്നത്.

എക്സിറ്റ് പോളുകൾ ഇന്ന്

അവസാന ഘട്ട വോട്ടെടുപ്പിന് ശേഷം എക്സിറ്റ് പോൾ ഫലങ്ങൾ ഇന്ന് പ്രഖ്യാപിക്കും. 14 നാണ് വോട്ടെണ്ണൽ.

ഉപതെരഞ്ഞെടുപ്പ് എട്ട് മണ്ഡലങ്ങളിൽ

വിവിധ സംസ്ഥാനങ്ങളിലെ 8 നിയമസഭാ സീറ്റുകളിലേക്കുള്ള ഉപതെരഞ്ഞെടുപ്പിനുള്ള വോട്ടെടുപ്പും ഇതോടൊപ്പം പുരോഗമിക്കുന്നു. 6 സംസ്ഥാനങ്ങളിലെയും ഒരു കേന്ദ്രഭരണ പ്രദേശത്തെയും എട്ട് നിയമസഭാ സീറ്റുകളിലേക്കുള്ള ഉപതെരഞ്ഞെടുപ്പാണ്. ജമ്മു കശ്മീരിലെ ബുഡ്ഗാം, നഗ്രോട്ട, രാജസ്ഥാനിലെ ആന്റ, ജാർഖണ്ഡിലെ ഘട്‌സില, തെലങ്കാനയിലെ ജൂബിലി ഹിൽസ്, പഞ്ചാബിലെ തരൺ തരൺ, മിസോറാമിലെ ഡാമ്പ, ഒഡീഷയിലെ നുവാപാഡ എന്നിവയാണ് ഈ മണ്ഡലങ്ങൾ.