ബംഗാളിൽ സിപിഐ എം 
ജില്ലാ സമ്മേളനങ്ങൾ പൂർത്തിയായി

കൊൽക്കത്ത : പശ്ചിമ ബംഗാളിൽ സിപിഐ എം ജില്ലാ സമ്മേളങ്ങൾ പൂർത്തിയായി. ഡിസംബർ 14ന് നാദിയ ജില്ലാ സമ്മേളനത്തോടെയായിരുന്നു തുടക്കം. ഫെബ്രുവരി 10ന് ഉത്തര 24 പർഗാനാസ് സമ്മേളനത്തോടെ 24 ജില്ലാ സമ്മേളനങ്ങളും പൂർത്തിയായി. ഒക്‌ടോബറിലും -നവംബറിലുമായി ബ്രാഞ്ച്, ഏരിയാ സമ്മേളനങ്ങൾ പൂർത്തിയായിരുന്നു. ഫെബ്രുവരി 22 മുതൽ 25 വരെ ഹുഗ്ലി ജില്ലയിലെ ദാങ്കുണിയിലാണ്‌ സംസ്ഥാന സമ്മേളനം.

തൃണമൂൽ കോൺഗ്രസ് അക്രമവും ബിജെപിയുടെ വർഗീയ വിദ്വേഷ പ്രവർത്തനങ്ങളും നേരിട്ട് സംസ്ഥാനത്ത് സിപിഐ എം വീണ്ടും സംഘടനാപരമായും ജനപിന്തുണയിലും കരുത്താർജിക്കുന്നുവെന്ന്‌ വിളിച്ചറിയിക്കുന്ന നിലയിലാണ്‌ സമ്മേളനങ്ങൾ പൂർത്തിയായത്‌. വമ്പിച്ച പൊതുസമ്മേളനങ്ങൾ എല്ലായിടത്തും നടന്നു. മുൻ കാലങ്ങളിൽ അക്രമണത്തെ തുടർന്ന് സമ്മേളനങ്ങൾ നടത്താൻ കഴിയാതിരുന്ന പല ഭാഗങ്ങളിലും ഇത്തവണ നടന്നു. പൂട്ടിക്കിടന്നിരുന്ന നിരവധി പാർടി ഓഫീസുകൾ തുറന്ന് പ്രവർത്തിക്കുകയും തൃണമൂലുകാർ കൈയടക്കി വെച്ചിരുന്ന പലതും വീണ്ടെടുക്കുകയും ചെയ്‌തു.