തിരുവനന്തപുരത്ത് വീടിന് തീപിടിച്ച് യുവാവ് മരിച്ചു

തിരുവനന്തപുരം: തിരുവനന്തപുരം മൺവിളയിൽ വീടിന് തീപിടിച്ച് ​ഗുരുതരമായി പൊള്ളലേറ്റ യുവാവ് മരിച്ചു. മൺവിള സ്വദേശി സുജിത്ത് (38) ആണ് മരിച്ചത്. തിരുവനന്തപുരം മെഡിക്കൽ കോളേജ് ആശുപത്രിയിൽ ചികിത്സയിലിരിക്കെയാണ് മരണം. വീട് പൂർണമായും കത്തിനശിച്ചു. സി​ഗരറ്റ് കത്തിച്ചപ്പോൾ തീപ്പൊരി വീണാണ് വീടിന് തീപിടിച്ചതെന്നാണ് പ്രാഥമിക വിവരം. ബുധൻ ഉച്ചകഴിഞ്ഞ് 2.15 ഓടെയാണ് സംഭവം. ആദ്യം ഒരു മുറിയിലാണ് തീപിടിച്ചത്. തു‌ടർന്ന് ജീവരക്ഷാർഥം സുജിത്ത് ശുചിമുറിയിലേയ്ക്ക് ഓടിക്കയറി. അപ്പോഴേയ്ക്കും തീ ആളിപടർന്നു.

കഴക്കൂട്ടത്തു നിന്നും അ​ഗ്നിരക്ഷാ സേനയെത്തിയാണ് തീയണച്ച് സുജിത്തിനെ ആശുപത്രിയിൽ‌ പ്രവേശിപ്പിച്ചത്. മൃതദേഹം പോസ്റ്റുമോർട്ടത്തിനു ശേഷം ബന്ധുക്കൾക്ക് വിട്ടുനൽകും. സി​ഗരറ്റിൽ നിന്നും തീപ്പൊരി വീണ് വീടൊന്നാകെ കത്തിയതിനു പിന്നിൽ ദുരൂഹതയുണ്ടെന്ന ആരോപണം ഉയർന്നു. സംഭവത്തിൽ പൊലീസ് അന്വേഷണം നടത്തും.