സൈബർ സംഘങ്ങളെ നിയന്ത്രിക്കാൻ കഴിയില്ല: രമേശ്‌ ചെന്നിത്തല

ആലപ്പുഴ: സമൂഹമാധ്യമങ്ങളിൽ അതിജീവിതക്കെതിരെ അപകീർത്തി പ്രചാരണം നടത്തുന്ന സൈബർസംഘങ്ങളെ നിയന്ത്രിക്കാൻ കഴിയില്ലെന്ന്‌ കോൺഗ്രസ്‌ നേതാവ്‌ രമേശ്‌ ചെന്നിത്തല. കോൺഗ്രസിന്റെ സമൂഹമാധ്യമ സംഘങ്ങൾ രാഹുൽ മാങ്കൂട്ടത്തിൽ എംഎൽഎ പ്രതിയായ പീഡനക്കേസിലെ അതിജീവിതയുടെ വിവരങ്ങൾ വെളിപ്പെടുത്തി അപകീർത്തിപ്പെടുത്തുന്നതുമായി ബന്ധപ്പെട്ട ചോദ്യങ്ങളോട്‌ പ്രതികരിക്കുകയായിരുന്നു അദ്ദേഹം.

സമൂഹ മാധ്യമങ്ങളിൽ അഭിപ്രായം പറയുന്നവരെ തടയാൻ കഴിയില്ല. കോൺഗ്രസ് അതിജീവതയെ അപമാനിച്ചിട്ടില്ല. സന്ദീപ് വാര്യർ അതിജീവിതയെ തിരിച്ചറിയും വിധം സമൂഹമാധ്യമങ്ങളിൽ ഇടപെടൽ നടത്തിയ വിഷയത്തെക്കുറിച്ച് അറിയില്ല. അക്കാര്യങ്ങൾ സന്ദീപിനോട്‌ ചോദിക്കണം. ഞങ്ങളാരും അങ്ങനെ ചെയ്യില്ല. രാഹൂൽ മാങ്കൂട്ടത്തിലിന്റെ വിഷയത്തിൽ കൃത്യമായ നടപടിയെടുത്തു. പാർട്ടിയിൽനിന്ന് മാറ്റിനിർത്തി. 

രാഹുലിനെതിരെയുള്ള കേസ്‌ രാഷ്ട്രീയ ഗൂഢാലോചനയാണെന്ന്‌ പറയുന്നില്ല. വ്യക്തിയെന്ന നിലയിൽ തെറ്റ്  ചെയ്തിട്ടുണ്ടെങ്കിൽ നിയമം നിയമത്തിന്റെ വഴിക്ക് പോകട്ടെ. കോടതി നടപടികൾക്ക്‌ ശേഷം മറ്റ്‌ കാര്യങ്ങൾ ആലോചിക്കും. രാഹുലിന് അനുകൂലമായി വീക്ഷണം പത്രം എഡിറ്റോറിയൽ എഴുതിയത് ശരിയായ നിലപാടല്ല. പത്രത്തിന്റെ എംഡി തന്നെ ഇ‍ൗക്കാര്യത്തിൽ വിശദീകരണം ചോദിച്ചിട്ടുണ്ടെന്നും അദ്ദേഹം പറഞ്ഞു.

​