അതിജീവിതയെ അപമാനിച്ച കേസ്: സന്ദീപ് വാര്യരെയും പ്രതിചേർത്തു

തിരുവനന്തപുരം: രാഹുൽ മാങ്കൂട്ടത്തിലിനെതിരെ ലൈംഗികാതിക്രമത്തിന് പരാതി നൽകിയ യുവതിയെ അധിക്ഷേപിച്ച കേസിൽ സന്ദീപ് വാര്യരെയും പ്രതിചേർത്തു. അതിജീവിതയെ അപമാനിച്ച കേസിൽ നാലാം പ്രതിയാണ് സന്ദീപ് വാര്യര്‍.

അതിജീവിത നൽകിയ പരാതിയുടെ അടിസ്ഥാനത്തിലാണ് സൈബര്‍ പൊലീസ് കേസെടുത്തത്. സമൂഹമാധ്യമത്തിലൂടെ രൂക്ഷമായ അധിക്ഷേപ പരാമർശങ്ങൾ നടത്തിയത്തിന്റെയും ഐഡന്റിറ്റി വെളിപ്പെടുത്തുന്ന തരത്തിലുള്ള പോസ്റ്റുകൾ പ്രചരിപ്പിച്ചതിന്റെയും അടിസ്ഥാനത്തിലായിരുന്നു കേസ്.

യുവതിയെ അധിക്ഷേപിച്ച കേസിൽ രാഹുൽ ഈശ്വറിനെയും പൊലീസ് കസ്റ്റഡിയിലെടുത്തിരുന്നു. സൈബറിടങ്ങളിലൂടെയും തന്റെ യുട്യൂബ് ചാനലിലൂടെയും അതിജീവിതയെ അധിക്ഷേപിക്കുന്ന തരത്തിൽ രാഹുൽ ഈശ്വർ നിരന്തരം പോസ്റ്റുകളും വിഡിയോകളും ഇട്ടിരുന്നു.

പരാതി നൽകുന്നതിന് മുമ്പ് തന്നെ അതിജീവിതയ്‌ക്കെതിരെ വളരെ മോശമായ പരാമർശങ്ങൾ രാഹുലും സന്ദീപും പല യുഡിഎഫ് ഹാൻഡിലുകളും നടത്തിയിരുന്നു. പരാതി നൽകിയതിന് ശേഷം യുവതിയുടെ ഐഡന്റിറ്റി വെളിപ്പെടുത്തുന്ന തരത്തിലേക്കും കാര്യങ്ങൾ എത്തി.

രാഹുലിനെതിരായ ലൈംഗികാതിക്രമ പരാതികള്‍ ഉയര്‍ന്നു വരാന്‍ തുടങ്ങിയ ആദ്യ ഘട്ടത്തില്‍ തന്നെ, അതിക്രമം നേരിട്ട യുവതികള്‍ക്കെതിരെ വലിയ രീതിയിലുള്ള അധിക്ഷേപങ്ങളായിരുന്നു നടന്നത്. പരാതി ന‍ല്‍കിയതിന് പിന്നാലെ അതിജീവിതയ്ക്ക് നേരെയും നിരന്തരം അധിക്ഷേപങ്ങളുയര്‍ന്നു. യുവതിയുടെ ഐഡന്‍റിറ്റി വെളിപ്പെടുത്താനും ഇതിലൂടെ മാനസികമായി തളര്‍ത്താനുമുള്ള ഗൂഡാലോചനയും കോണ്‍ഗ്രസിന്‍റെ ഭാഗത്ത് നിന്നുണ്ടായി.

രാഹുൽ മാങ്കൂട്ടത്തിലിനെതിരെ ലൈം​ഗിക ചൂഷണത്തിന് പരാതി നൽകിയ യുവതിയുടെ വിവരങ്ങൾ വെളിപ്പെടുത്തുന്നതിന് പിന്നില്‍ കോൺ​ഗ്രസ് നേതാക്കളടങ്ങുന്ന വാട്ട്സാപ്പ് ​ഗ്രൂപ്പിൽ നടന്ന ​ഗൂഢാലോചനയാണെന്ന് ഡോ. പി സരിൻ വെളിപ്പെടുത്തിയിരുന്നു. കോൺഗ്രസിൻ്റെ സോഷ്യൽ മീഡിയയിലെ പോസ്റ്റും കമൻ്റും നിയന്ത്രിക്കുന്ന ഇൻസ്റ്റൻൻ്റ് റെസ്പോൺസ് ടീമിൻ്റെ വാട്സാപ്പ് ഗ്രൂപ്പിലാണ് ഇത് സംബന്ധിച്ച് ​ഗൂഢാലോചന നടന്നത്.

ഇത്തരം ഗൂഡാലോചനയുടെ കൂടി ഫലമായാണ് രാഹുല്‍ ഈശ്വറിനെ പോലെയുള്ളവര്‍ യുവതിയുടെ ഐഡന്‍റിറ്റി വെളിപ്പെടുത്തുന്ന തരത്തിലും അധിക്ഷേപിക്കുന്ന തരത്തിലും പരാമര്‍ശങ്ങള്‍ വരുന്നത് എന്നത് വ്യക്തമാവുകയാണ്.