ട്രെയിനിലെത്തും, കട്ടെടുത്ത്‌ മടങ്ങും; മാങ്ങാനം മോഷ്ടാകൾക്കായി പൊലീസ്‌ വല വിരിച്ചു

കോട്ടയം: നഗരത്തിലും പരിസരപ്രദേശങ്ങളിലും തുടർച്ചയായി നടക്കുന്ന മോഷണങ്ങളിൽ പ്രതികളാകുന്നത്‌ കൂടുതലും ഇതര സംസ്ഥാനക്കാർ. പലരും മോഷണം തൊഴിലാക്കിയവരാണ്‌. ട്രെയിനിലെത്തി കവർച്ച നടത്തി മടങ്ങുന്ന ഉത്തരേന്ത്യൻ സംഘമെന്നാണ്‌ നിഗമനം. സംസ്ഥാനത്തിന്‌ പുറത്തുപോയി അവരെ പിടികൂടുകയാണ്‌ പൊലീസ്‌.

മാങ്ങാനത്ത് വില്ല കുത്തിത്തുറന്ന് 50 പവൻ മോഷ്ടിച്ച ചെയ്ത സംഘത്തിലെ പ്രധാനി ഇതര സംസ്ഥാനക്കാരനാണ്‌. കർണാടകയിൽ രജിസ്റ്റർചെയ്ത കവർച്ച കേസുകളിലെ പ്രതിയാണ്‌ ഇയാൾ. ഇയാളിലേക്ക്‌ എത്താനുള്ള എല്ലാവഴികളും പൊലീസിന്‌ ലഭിച്ചു. കോട്ടയം ഡിവൈഎസ്‌പി നേതൃത്വത്തിലുള്ള 15 അംഗ പ്രത്യേകസംഘമാണ്‌ കേസ്‌ അന്വേഷിക്കുന്നത്‌. വെള്ളി രാത്രി 11ന്‌ മോഷ്ടാക്കൾ പ്രദേശത്ത് എത്തിയതായി സിസി ടിവിയിൽ വ്യക്തമാണ്. നിരവധി ഫോൺകോളുകൾ പരിശോധിച്ചെങ്കിലും സംശയകരമായി ഒന്നും കണ്ടെത്താനായില്ല.

ട്രെയിനിലെത്തി കവർച്ച നടത്തി മടങ്ങുന്ന ഉത്തരേന്ത്യൻ സംഘമെന്നാണ്‌ നിഗമനം. പ്രതികളുടെ സിസിടിവി ദൃശ്യങ്ങൾ പൊലീസ് റെയിൽവേ പൊലീസിന്‌ കൈമാറി. സ്‌കൈ ലൈൻ പാം മെഡോസ് 213. നമ്പർ വില്ല, ആയുഷ് മന്ത്ര വെൽനെസ് ക്ലിനിക് എന്നിവിടങ്ങളിലെ മോഷണം കൂടാതെ നാലിടങ്ങളിൽ അന്ന് മോഷണശ്രമവും നടന്നിട്ടുണ്ട്‌. അഞ്ച്‌ പേരാണ്‌ സംഘത്തിലുള്ളത്‌. വില്ലയിൽ അമ്പൂങ്കയത്ത്​ അന്നമ്മ, മകൾ സ്​നേഹ ഫിലിപ്പ്​ എന്നിവർ താമസിക്കുന്ന 21 –ാം നമ്പർ കോട്ടേജിലാണ്‌ മോഷണം നടന്നത്​. സ്​നേഹയുടെ ഭർത്താവ്​ വിദേശത്താണ്​. എൺപത്തിനാലുകാരിയായ അന്നമ്മയ്‌ക്ക്​ സുഖമില്ലാത്തതിനാൽ ശനി പുലർച്ചെ ആംബുലൻസ്​ വിളിച്ച്​ ആശുപത്രിയിൽ പോയിരുന്നു. രാവിലെ ഇരുവരും തിരിച്ചെത്തിയപ്പോഴാണ്​ മോഷണവിവരം അറിഞ്ഞത്.

​

​പ്രൊഫഷണൽ മോഷ്‌ടാക്കൾ

മോഷണ സംഘത്തിലെ ഒരാൾ പൂട്ട്‌ പൊളിക്കാനും മറ്റേയാൾ കതക്‌ കുത്തിത്തുറക്കാനും പരിശീലനം ലഭിച്ചയാൾ. മാങ്ങാനത്തെ മോഷണം ഇങ്ങനെയാണ്‌. മോഷണത്തിനായി പ്രത്യേക ഉപകരണം ഉപയോഗിക്കുന്നു. സിസി ടിവിയിൽ ഇക്കാര്യങ്ങൾ വ്യക്തം.