നോര്‍ക്ക പ്രവാസി കോ–ഓപ്പറേറ്റീവ് 
സൊസൈറ്റീസ് കോണ്‍ക്ലേവിന് തുടക്കം

കൊച്ചി

നോര്‍ക്ക റൂട്ട്സ് അസി. പ്രവാസി കോ–ഓപ്പറേറ്റീവ് സൊസൈറ്റീസ് കോണ്‍ക്ലേവ്–2025ന് പാലാരിവട്ടം ദി റിനൈ കണ്‍വന്‍ഷന്‍ സെന്ററില്‍ തുടക്കമായി. നോർക്ക റൂട്ട്​സിന്റെ ഗ്രാന്റ് ലഭിച്ച പ്രവാസി സഹകരണ സംഘങ്ങളുടെ പ്രതിനിധികൾക്കായുള്ള കോണ്‍ക്ലേവ് നോര്‍ക്ക റൂട്ട്സ് റസിഡന്റ് വൈസ് ചെയര്‍മാന്‍ പി ശ്രീരാമകൃഷ്ണന്‍ ഉദ്​ഘാടനംചെയ്​തു. തിരികെയെത്തിയ പ്രവാസികളുടെ പുനരധിവാസത്തിനും പുനസംയോജനത്തിനും​ ഉതകുംവിധം കേരളത്തിലെ പ്രവാസി സഹകരണ സ്ഥാപനങ്ങള്‍ ഉയരണമെന്ന്​ അദ്ദേഹം പറഞ്ഞു.

നോർക്ക അസിസ്റ്റന്റ്​ ആൻഡ്​ മൊബിലൈസ്ഡ് എംപ്ലോയ്മെന്റ് എംപ്ലോയര്‍ രജിസ്ട്രേഷന്‍ പോര്‍ട്ടലിന്റെയും ഉദ്ഘാടനവും അദ്ദേഹം നിർവഹിച്ചു. നോര്‍ക്ക റൂട്ട്സ് ചീഫ് എക്സിക്യൂട്ടീവ് ഓഫീസര്‍ അജിത് കോളശേരി അധ്യക്ഷനായി. കേരള ഇൻസ്റ്റിറ്റ്യൂട്ട് ഫോര്‍ എൻട്രപ്രണര്‍ഷിപ്​ ഡെവലപ്മെന്റ് ചീഫ് എക്സിക്യൂട്ടീവ് ഓഫീസര്‍ എസ്​ സജി, നോര്‍ക്ക അഡീഷണല്‍ സെക്രട്ടറി എസ്​ സിന്ധു, അമ്പിളി ആന്റണി, കെ രമണി എന്നിവർ സംസാരിച്ചു.

സംസ്ഥാനത്തെ 51 പ്രവാസി സഹകരണ സംഘങ്ങളില്‍നിന്ന്​ 140 പ്രതിനിധികള്‍ പരിശീലനപരിപാടിയില്‍ പങ്കെടുക്കുന്നു. കോണ്‍ക്ലേവ്​ വെള്ളി വൈകിട്ട്​ സമാപിക്കും.