ദുരന്തബാധിതരുടെ പേരിൽ ലീഗിന്റെ ഭൂമിക്കൊള്ള ; വിറ്റത്​ തോട്ടഭൂമിയെന്ന്​ ഉടമകൾ

കൽപ്പറ്റ

ചൂരൽമല– മുണ്ടക്കൈ ദുരന്തബാധിതർക്ക്‌ വീടുനിർമിക്കാൻ മേപ്പാടി പഞ്ചായത്തിലെ തൃക്കൈപ്പറ്റയിൽ മുസ്ലിംലീഗ്​ വാങ്ങിയത്​ തോട്ടഭൂമിയെന്ന് ഉടമകൾ. ലാൻഡ്​ ബോർഡ്​ ഹിയറിങ്ങിലാണ്​ ഉടമകൾ ഇത്​ സമ്മതിച്ചത്​. തോട്ടം വാങ്ങിയശേഷം ലീഗ്​ നേതൃത്വമാണ്​​ കാപ്പിച്ചെടികൾ പിഴുത് തരംമാറ്റാൻ ശ്രമിച്ചതെന്ന്​​ ഉടമകൾ മൊഴിനൽകിയതായി താലൂക്ക്​ ലാൻഡ്​ ബോർഡ്​ അധികൃതർ പറഞ്ഞു. തോട്ടംഭൂ‍മിയല്ലെന്നും നിർമാണ യോഗ്യമായ ഭൂമി ‘പൊന്നുംവിലയ്​ക്ക് ’ വാങ്ങിയെന്നുമാണ്​ ലീഗിന്റെ അവകാശ വാദം​. എന്നാൽ, തോട്ടംഭൂമി സെന്റിന്​ 15,000 രൂപയ്​ക്കുവരെ ലഭിക്കുന്ന പ്രദേശത്ത് സെന്റിന്​​ 98,000 രൂപ മുതൽ 1.22 ലക്ഷം രൂപവരെ വില നൽകി തട്ടിപ്പുനടത്തുകയായിരുന്നുവെന്ന് ഇതോടെ​ വ്യക്തമായി.

ലീഗ്​ വാങ്ങിയ 11.21 ഏക്കറിലെ ഒരേക്കർ ഒഴികെ ബാക്കി നിർമാണ അനുമതിയില്ലാത്ത കാപ്പിത്തോട്ടമാണെന്ന വില്ലേജ്‌ ഓഫീസറുടെ റിപ്പോർട്ടിനെ തുടർന്നാണ്​ ഭൂഉടമകൾക്ക്​ വൈത്തിരി താലൂക്ക്‌ ലാൻഡ്‌ ബോർഡ്‌ നോട്ടീസ്‌ നൽകിയത്​. പി കെ കുഞ്ഞാലിക്കുട്ടിയുടെ ബന്ധുവും വീട്​ നിർമാണസമിതി അംഗവുമായ അഭിഭാഷകൻ കല്ലൻകോടൻ മൊയ്തുവാണ്​ ഹിയറിങ്ങിൽ ഹാജരായി മൊഴിനൽകിയത്​. മൊയ്​തുവടക്കം അഞ്ചുപേരിൽനിന്നാണ് ലീഗ്​​ ഭൂമി വാങ്ങിയത്​. മൊയ്‌തു ലീഗിന്റെ നിർമാണസമിതിക്ക്‌ നിയമോപദേശവും നൽകിയിരുന്നു. ഇതോടെ ദുരന്തബാധിതരുടെ പേരിൽ ലീഗിനുള്ളിൽ നടന്ന കൊള്ളയാണ്​ പുറത്തുവരുന്നത്​.