ദേശീയപാത നിർമാണത്തിന്‌ സൂക്ഷിച്ച 200 കിലോ കമ്പി മോഷ്ടിച്ച ഡൽഹി സ്വദേശികൾ പിടിയിൽ

ചേർത്തല: ദേശീയപാത പുനർനിർമാണത്തിന്‌ സൂക്ഷിച്ച 200 കിലോയോളം കമ്പി മോഷ്ടിച്ച നാല്‌ ഡൽഹി സ്വദേശികൾ പിടിയിൽ. ചേർത്തല നഗരത്തിലെ ഹൈവേപ്പാലം നിർമാണത്തിനിറക്കിയ കമ്പിയാണ്‌ മോഷ്ടിച്ചത്‌. നോർത്ത്‌ വെസ്‌റ്റ്‌ ഡൽഹി സ്വദേശി അഷ്‌റഫ് ഖാൻ(23), സൗത്ത്‌ ഡൽഹി സ്വദേശി മുഹമ്മദ് ഫിറോസ്(38), നോർത്ത്‌ വെസ്‌റ്റ്‌ ഡൽഹി സ്വദേശി സമീർ(19), റഹീസ്(23) എന്നിവരെയാണ് ചേർത്തല പൊലീസ് അറസ്‌റ്റുചെയ്‌തത്.

നഗരസഭ 25-ാം വാർഡിൽ വല്ലയിൽ ഷാപ്പിന് സമീപം വാടകവീട്ടിൽ താമസക്കാരാണ്‌ ഇവർ. പകൽസമയം ആക്രിപെറുക്കാൻ മുച്ചക്രസൈക്കിളിൽ കറങ്ങുന്നവർക്ക്‌ രാത്രി ആളില്ലാത്തയിടങ്ങളിൽ മോഷണമാണ് പതിവെന്ന്‌ പൊലീസ്‌ പറഞ്ഞു. മോഷ്ടിച്ച സാധനങ്ങൾ താമസസ്ഥലത്തിന് സമീപത്തെ കുളത്തിൽനിന്ന്‌ പൊലീസ് കണ്ടെടുത്തു.

ചേർത്തല പൊലീസ് സ്‌റ്റേഷൻ ഇൻസ്‌പെക്ടർ ജി അരുൺണിന്റെ നേതൃത്വത്തിൽ എസ്‌ഐമാരായ എസ്‌ സുരേഷ്, കെ പി അനിൽകുമാർ, എസ്‌ എസ്‌ ആദർശ്, എസ്‌ സന്തോഷ്‌കുമാർ, സീനിയർ സിവിൽ പൊലീസ്‌ ഓഫീസർമാരായ സതീഷ്, വിനീഷ്, സുധീഷ്, അനീഷ്‌കുമാർ എന്നിവരടങ്ങിയ സംഘമാണ്‌ പ്രതികളെ പിടികൂടിയത്.

പ്രതികളെ കോടതി റിമാൻഡുചെയ്‌തു. ദേശീയപാത നിർമാണവുമായി ബന്ധപ്പെട്ട് മറ്റിടങ്ങളിൽ ഇവർ മോഷണം നടത്തിയിട്ടുണ്ടോയെന്ന് അറിയാൻ കസ്‌റ്റഡിയിൽവാങ്ങി കൂടുതൽ അന്വേഷിക്കുമെന്ന്‌ പൊലീസ്‌ പറഞ്ഞു.