സ്ത്രീകളുടെ ആരോ​ഗ്യ സംരക്ഷണത്തിന് വേണ്ടി കേരളത്തിൽ ക്ലിനിക്കുകൾ: രാജ്യത്ത് ആദ്യം

തിരുവനന്തപുരം: സ്ത്രീകളുടെ മാനസികവും ശാരീരികവുമായ സൗഖ്യം പരിപാലിക്കുന്നതിനായി കേരളത്തിൽ ക്ലിനിക്കുകൾ ( വുമൺസ് വെൽനസ് ക്ലിനിക്ക്). രാജ്യത്ത് ആദ്യമായാണ് സ്ത്രീകളുടെ ആരോ​ഗ്യ സംരക്ഷണത്തിനായി ഇത്തരം ഒരു പദ്ധതി ആരംഭിക്കുന്നത്. കഴിഞ്ഞ രണ്ട് മാസക്കാലമായി ജനകീയ ആരോ​ഗ്യ കേന്ദ്രങ്ങളിൽ സ്ത്രീകൾക്കായുള്ള ക്ലിനിക്കുകൾ പ്രവർത്തിക്കുന്നു. പദ്ധതിയുടെ സംസ്ഥാനതല ഉദ്ഘാടനം സപ്തംബർ 16ന് നടത്തുമെന്ന് ആരോ​ഗ്യമന്ത്രി വീണാ ജോർജ് അറിയിച്ചു.

ചൊവ്വാഴ്ചകളിലാണ് വുമൺസ് വെൽനസ് ക്ലിനിക്കുകൾ പ്രവർത്തിക്കുന്നത്. എല്ലാ ആരോ​ഗ്യ പ്രവർത്തകരും ക്ലിനിക്കിനെക്കുറിച്ച് പൊതുജനങ്ങളുമായി ആശയവിനിമയം നടത്തണമെന്ന് മന്ത്രി പറഞ്ഞു. പ്രമേഹം, രക്ത സമ്മർദ്ദം എന്നിവ പരിശോധിക്കുന്നതിലൂടെയും വിളർച്ച തടയുന്നതിലൂടെയും സ്ത്രീകളുമായി ബന്ധപ്പെട്ട ജീവിത ശൈലി രോ​ഗങ്ങൾ പ്രതിരോധിക്കുകയാണ് ലക്ഷ്യം വയ്ക്കുന്നത്. രക്തസ്രാവം, മെനോപോസ്, തുടങ്ങിയ പ്രശ്നങ്ങൾ പരിഹരിക്കുന്നതിൽ സ്ത്രീ ക്ലിനിക്കുകൾ സഹയകമാകുമെന്നും മന്ത്രി അറിയിച്ചു.

രോ​ഗപ്രതിരോധം, രോ​ഗനിർമാർജനം, ആരോ​ഗ്യ സംരക്ഷണം എന്നിവ ലക്ഷ്യം വച്ചാണ് സംസ്ഥാനത്തെ ജനകീയ ആരോ​ഗ്യ കേന്ദ്രങ്ങൾ പ്രവർത്തിക്കുന്നത്. ജനകീയ ആരോ​ഗ്യ കേന്ദ്രങ്ങളിലൂടെ ആരോ​ഗ്യം ആനന്ദം, അകറ്റാം അർബുദം, വിളർച്ചയിൽ നിന്ന് വളർച്ചയിലേക്ക് കേരളം (വിവ) എന്നിങ്ങനെ നിരവധി കാമ്പയിനുകളും നടക്കുന്നു.

ഈ സർക്കാരിൻ്റെ കാലഘട്ടത്തിലാണ് 5415 ജനകീയ ആരോഗ്യ കേന്ദ്രങ്ങൾ ആരംഭിച്ചത്. പഞ്ചായത്ത് തലത്തിൽ പ്രാഥമികാരോ​ഗ്യ കേന്ദ്രങ്ങളെ കുടുംബാരോ​ഗ്യ കേന്ദ്രങ്ങളാക്കി മാറ്റി. താലൂക്ക് ആശുപത്രി തലം മുതൽ സ്പെഷ്യാലിറ്റി സേവനങ്ങൾ ആരംഭിച്ചു. ഒപിഡി ട്രാൻസ്ഫർമേഷൻ തുടങ്ങി.

12 ഡയാലിസിസ് യൂണിറ്റുകളിൽ നിന്ന് 126 ഡയാലിസിസ് സെന്ററുകൾ ഇപ്പോൾ പ്രവർത്തിക്കുന്നു. ജില്ലാ ആശുപത്രികളിൽ കാത്ത് ലാബുകൾ സ്ഥാപിച്ചു. കാസർ​കോടും വയനാടുമാണ് അടുത്തിടെ കാത്ത് ലാബുകൾ സ്ഥാപിച്ചത്. ആലപ്പുഴയിൽ നിർമാണ പ്രവവർത്തനങ്ങൾ പൂർത്തിയായി. ഇടുക്കിയിലും അടിസ്ഥാന നിർമാണം പൂർത്തിയായി. ജില്ലാ ആശിപത്രിയിൽ സൂപ്പർ സ്പെഷ്യാലിറ്റി സേവനങ്ങൾ, മെഡിക്കൽ കോളേജുകൾ മികവിന്റെ കേന്ദ്രങ്ങളായുള്ള പ്രവർത്തനങ്ങൾ എന്നിവയും നടക്കുന്നുണ്ട്. ‌

മെഡിക്കൽ വിദ്യാഭ്യാസം രം​ഗത്തും കേരളം മികച്ച നേട്ടം കൈവരിച്ചു. എല്ലാ ജില്ലകളിലും മെഡിക്കൽ കോളേജുള്ള സംസ്ഥാനമായി കേരളം. ഈ സർക്കാരിന്റെ കാലത്ത് മാത്രം നാല് ജില്ലകളിൽ മെഡിക്കൽ കോളേജ് ആരംഭിക്കാൻ കഴിഞ്ഞു. 21 നഴ്സിങ് കോളേജുകൾ സർക്കാർ, സർക്കാർ ഇതര കോളേജുകൾ ആരംഭിക്കാൻ കഴിഞ്ഞു.

2023-24 കാലഘട്ടത്തിൽ നടത്തിയ പരിശോധനയിലൂടെയാണ് കേരളം അമീബിക് മസ്തിഷ്കജ്വരം കണ്ടെത്തുന്നത്. പരിശോധനകളിൽ ഫലം നെ​ഗറ്റീവാണെങ്കിലും രോ​ഗം കണ്ടെത്തുന്നതെന്തുകൊണ്ട് എന്ന അന്വേഷണത്തിലാണ് പിന്നീട് അമീബയാണ് രോ​ഗത്തിന് കാരണമെന്ന് മനസിലാക്കുന്നത്.

അമീബിക് മസ്തിഷ്ക ജ്വരം മൂലമുള്ള മരണ നിരക്ക് കേരളത്തിന് ​ഗണ്യമായി കുറയ്ക്കാൻ സാധിച്ചു. കൂട്ടായ പ്രവർത്തനമാണ് രോ​ഗപ്രതിരോധത്തിനായി നടക്കുന്നത്. ജലമാണ് ജീവൻ എന്ന ക്യാമ്പയിനും ബോധവത്കരണത്തിന്റെ ഭാ​ഗമായി നടക്കുന്നുണ്ട്. അമീബിക് മസ്തിഷ്ക ജ്വരവും ഫം​ഗസ് ബാധയുമുണ്ടായി തിരുവനന്തപുരം മെഡിക്കൽ കോളേജിൽ ചികിത്സയിൽ കഴിഞ്ഞ വിദ്യാർഥി രോ​ഗമുക്തി നേടിയെന്നും ഇത് ലോകത്ത് തന്നെ ആദ്യമായാണെന്നും മന്ത്രി പറഞ്ഞു.

ദേശിയ സർവേയിൽ രാജ്യത്ത് ശിശു മരണ നിരക്ക് ഏറ്റവും കുറവുള്ള സംസ്ഥാനം കേരളമാണ്. യു എസിനെക്കാൾ കുറവ് ശിശുമരണ നിരക്കിലേക്ക് കേരളമെത്തി. ഈ പ്രവർത്തനത്തിൽ പങ്കാളികളായ എല്ലാവരെയും മന്ത്രി അഭിനന്ദിച്ചു.