ഇംഗ്ലീഷ് പ്രീമിയർ ലീഗ്; ക്രിസ്റ്റൽ പാലസ് ലീഡ്സ് യുണൈറ്റഡ് മത്സരം സമനിലയിൽ

ലീഡ്സ് : ഇംഗ്ലീഷ് പ്രീമിയർ ലീഗിൽ ക്രിസ്റ്റൽ പാലസിനെതിരായ പോരാട്ടത്തിൽ ഗോൾ രഹിത സമനില വഴങ്ങി ലീഡ്സ് യുണൈറ്റഡ്. ഇലാൻഡ് റോഡിൽ നടന്ന മത്സരത്തിൽ ഇരു ടീമുകൾക്കും ഗോളുകളൊന്നും നേടാനായില്ല. ആദ്യ പകുതിയിൽ ഇരുടീമുകൾക്കും കൃത്യമായ അവസരങ്ങൾ സൃഷ്ടിക്കാൻ സാധിച്ചില്ലെങ്കിലും രണ്ടാം പകുതിയുടെ തുടക്കത്തിൽ ക്രിസ്റ്റൽ പാലസ് ആക്രമിച്ചു കളിച്ചു. എറെമി പിനോയുടെ ഫ്രീക്കിക്ക് ലീഡ്സ് ഗോൾകീപ്പർ ജെയിംസ് ട്രാഫോർഡ് തടഞ്ഞുനിർത്തി.

തുടർന്ന് ക്രിസ്റ്റൽ പാലസിന്റെ ടൈറിക് മിച്ചൽ വലകുലുക്കിയെങ്കിലും അസിസ്റ്റ് നൽകിയ അനാൻ ഖലൈലി ഓഫ്‌സൈഡായതിനെ തുടർന്ന് റെഫറി ഗോൾ നിഷേധിച്ചു. ലീഡ്സിന്റെ ഏറ്റവും മികച്ച അവസരം ഡൊമിനിക് കാൽവർട്ട്-ലെവിന് ലഭിച്ചെങ്കിലും താരം ശക്തമായ ഷോട്ട് പാലസ് ഗോൾകീപ്പർ വാൾട്ടർ ബെനിറ്റെസ് തടഞ്ഞു.

മത്സരം അവസാനിക്കാൻ നിമിഷങ്ങൾ ബാക്കിനിൽക്കെ ഇസ്മായില സാറിന്റെ ഗോൾ ശ്രമം പ്രതിരോധ താരം താരീഖ് മുഹാരെമോവിച്ച് ബ്ലോക്ക് ചെയ്തത് ലീഡ്സിന് രക്ഷയായി. സമനിലയോടെ അഞ്ച് മത്സരങ്ങളിൽ നിന്ന് രണ്ട് ജയവും മൂന്ന് സമനിലയുമായി 9 പോയിന്റോടെ ലീഡ്സ് യുണൈറ്റഡ് പോയിന്റ് പട്ടികയിൽ അഞ്ചാം സ്ഥാനത്താണ്. അഞ്ച് മത്സരങ്ങളിൽ നിന്ന് 4 പോയിന്റുള്ള ക്രിസ്റ്റൽ പാലസ് 15-ാം സ്ഥാനത്താണ്.